Maharashtra nung doctor 4,000-i longkak ait

Mumbai, March 22 (Agenices): Tanü agi anogo asemnübuba Maharashtra sorkar hospital tem nung doctor temi casual leave agia longkak aitdang tanübo Indian Medical Association (IMA) nungia densema parnok 4000 tashii longkak aitogo.
Mongolbarnü Bombay High Court-i tetuyuba agüja amokmerenaka Maharashtra Association of Resident Doctors (MARD)-i, shiranger kinüngertemi doctor tem dak teka sangshiba nokdangtsü atema sorkari doctor tem nem security magütsü tashi longkak aittsü, ta ashi.
Ano külen state sorkari, Bodhbar aonung 8:00 ako tashi nungbo doctor tem dang mapai aotsü tuyu, ajimesüra ita trok itasen magutsütsü ta meren.
“Onoki parnok nem mapang latettsüogo,” ta Medical Education Minister, Girish Mahajan-i osangbenertem dang metetdaktsü.
Mumbai densema Maharashtra tesem balala nunga nija hospital kiburtemi longkak aiter doctor tem dang mapa nungi anentsütsü amokmeren.
MARD otongdar-i ashiba agi, Nagpur nung doctor 370 aser Solapur nung doctor 114 mapa nungi anentsütsü amokmeren.
BrihanMumbai Municipal Corporation (BMC)-ia doctor 500 shi dang mapa inyakang mesüra Bombay High Court-i tuyuba ama inyaktsü, ta metetdaktsüogo.
IMA Tir, Ashok Tamble-i, Bodhbar nungi sorkar hospital tem nung inyaker doctor 40,000-i longkak aittsü, ajisüaka rongdak medical services bo agutsütsü, ta metetdaktsü.
Longkak aitertemi Violence Against Doctors Act, 2010 benoka inyaktsü aser court-i tuyua aliba ama parnok nem security agutsütsü akhanger.
New Delhi nungia MARD pusema AIIMS Resident Doctors Association-ia, sorkari doctor tem nem security agutsütsü melena parnok itasen nungi sen katitsü aser hostel nungi aienshidaktsütsü ang amokmerener, ta aitsü.
Ano IMA-ia, Maharashtra nung par züngsem doctor 45,000 aser India nung doctor 20,000-ia sorkari longkak aiter doctor tem anema inyaktsü merenbaji aitsür, ta ashi.
Bombay High Court Chief Justice Manjula Chellur aser Justice GS Kulkarni nati jangjajangja, doctor temi longkak aitba anener mapa inyaktsüla, mesüra sorkari parnok nem temerenshi agütsütsü temeten lir, ta shiogo.