July 1, 2017 nungi GST benoktsü merangdar: Arun Jaitley

New Delhi, March 22 (Agencies): Tanü Union Finance Minister, Arun Jaitley-i, July 1, 2017 nü nungi tenzüka GST benoktsü sorkari merangdar, koba ajanga goods & services dalangba akumtsü aser saru magütsürtem mejenbutsü, ta ashi.
Finance Minister-isa, growth rate shilem 7-8 akumba osangji tejangja aser alima nung rongsenkettsüng jenjang tajungba kümra GDP ano aintsü, ta ashi.
Jaitley-i ashiba agi, demonetization ajanga maneni rongsenkettsüng nung temelenshi alitsü aser GDP aintsü.
Tanü Delhi nung 23buba Commonwealth Auditors General conference nung jembidang Jaitley-i, “Onoki July 1 nü nungi tenzüka mapa küma benoktsü merangbaji Goods & Services Tax lir. Iba ya ajanga saru timba akumtsü, saru madak saru malitsü, aser ibaji ajanga osettsüset, chiyungtsü aser service balala tera dalangba akumtsü aser inyakyim tezübaba akumtsü,” ta metetdaktsü.
Paisa ashiba agi, saru magütsürtem mejenbutsü atema tax department-i I-T tashi taitba akumtsü atema inyakdar.
“Iba (GST) ya inyaktettsü atema ozüngtemji tang Parliament nung lir, aser ibaji agizükra, taküm küm tomlen nungibo item ozüng benoktsü imlar,” ta pai ashi.
Alima nung saru inyakyim tasaktiba, GST ya kodang benokdir iba saru inyakyim ya alima nung saru inyakyim temelaba akumtsü, ta pai ashi.
Tan hopta tsüngda Union Cabinet-i GST ozüng tali pezü agizükogo, aser itemji Parliament nung tang tagidak budget senden nung benoktsü.
Jaitley-isa, India ji maneni alima nung rongsenkettsüng tekaratiba ainba linüksa asutsü, ta metetdaktsü.
“Tesüiba küm asem nung alima nung rongsenkettsüng tekaratiba ainba linükji asenok liasü, aser maneni asenoksa asutsü. India-i growth rate shilem 7-8 ajangzüktetba osangji tejangja lir,” ta Union minister-i ashi.
“Alima linüktem nung rongsenkettsüng asentenshia inra, asenoki ano taliba tejakleni otettsü,” ta paisa metetdaktsü.