Dimapur nung ‘World water day’ among

Dimapur, March 22 (TYO): ‘Women Short Stay Home’, ‘Prodigals’ Home’ aser ‘Wondang ki charitable foundation’ nungi tetsür, tanur aser staff-tem 2017 March 22 nü ‘women short stay home’, fellowship colony, Dimapur nung Childline Dimapur puri ayonga ‘world water day’ monga liasü.
Iba sentong ya taküm libaliro balala nung tzü nüngdakba koda tongtibang, ibaji metetdaktsütsü nükjidong nung among.
Iba sentong nung tongti o jembirtemji, Mr. Azhupeo Kape, Greenwood Higher Secondary School nung class 12 nung azünger aser Ms. Gracy Rolnu, Christian Higher Secondary School Dimapur nung class 12 nung azünger na liasü.
Sentong nung tongti o jembir ana ya ‘national level training on Sustainable Development Goal’ sentong Delhi nung akadang state tenüng nung oa dena liasü. Azhupeo-i tang asoshi dang masü saka tarutsü atemaa tzü laloshiponga mamshi wazüka ayutsüba onük nung jembi.
Pai onük jembidang ashiba agi, alima nung nisung million 663-bo tzü tajung magishii lidar. Pai maneni sentong nung adenertem dang tzü dak sendakba nung tongtibang onüktem tanüngba nüburtem nem angatetdaktsütsü asoshi ajungshi.
Tsünglutzü bendena ayutsüba aser atsü nung tzü agütsütsü iba den külemi metsümeshidang amshitsü asoshi tzü ‘recycle’ süa amshitsü asoshi pai onük nung jembisema liasü.
Gracy Rolnu-i taoba mapang linük Tir aser asür Dr. APJ Abdul Kalam indang tesayuba ‘Water 2070’ nung ajemdaker lemsatep. Tzü wazüka ayutsü asoshi tanü nungi tenzüktsüla, ta lai ashi.
Lai ketdangsüa sentong nung shilem agirtemi ‘Water Pledge’ agi.
Tenangzükba agiba nungji yamai zülua lir; “Ni tzü wazüka ayutsü aser shisa kaa amshitsü nangzüker. Ni tzü kümdanga amshitsü aser tzüjang kata laloshipong masütsü nangzüker. Ni tzüji ajak dang nung tongtibangtiba rongsen ama züngshitsü aser yamaji ajemtsü. Ni ozü kibong, medemertem aser kidangertemi tzü laloshipong mesüi shisakaa amshitsü asoshi ajungshitsü nangzüker. Iba ya asen lima aser asenoki kümzüktettsü.”
Sentong nung CHILDLINE team züngsem, Amanwange Newmai-i ‘ministry of women and child development’ kübok sentong ka ama inyakba CHILDLINE indang tatsüka jembiba sülen sentong tembanga liasü.