Mapa meinyaki taa angutsü imlabaji ozüng alema: K. Therie

Dimapur, March 22, 2017: Bodhbarnü Dimapur nung NPCC Tir, K. Therie-i Tetso College  kaketshirtem den jembiba yangi noksa nung angur.

Dimapur, March 22 (TYO): Tanü NPCC Tir, K. Therie-i Tetso College, Dimapur kaketshirtem den jembidang pai kaketshirtemi peii jangraba lenla nung mapa junga ashitsü atema ajungshi.
Tetso College nung ayongba sentong ka nung jembidang Therie-i kaketshirtem dang mapa meranga inyakba sobaliba benshitsü ajungshiba den külemi pai, mapa meinyaki taa angutsü imlabaji lokti anema benshiba ka lir, ta ashi.
Paisa lanurtem dang, pei tetsü tasoli meimtsü aser state telungtet nung tarutsü atema maongka balala yanglutettsüla, ta ajungshi.
Therie-isa, ochimashiji lenla ajak nung junga amentetogo, aser tarutsü nung temelenshi alitsü atema lanurtemi tongti shilem agia inyaktsüla, ta ashi.
Pai ashiba agi, India sorkari CSSs jenti agutsür, ajisüaka item jagi tajangzük angutsüpur ket matonger, iba den külemi state rongsenkettsünga jenjang mejungi lir.
Election mapang nung lanurtemi tangar melen vote agütsüba (proxy) tatishitsü shia pai lanurtem dang, “Tangatetba tajung nungi masetshitsüla aser tangatetba tajung agi (election nung) shilem agitsüla, kechiyong tarutsü putuji nenok meyong lir aser ita ishika mapang nung nenoki telemtetba shitak agiba aser inyakba ajanga ibaji latettsü,” ta ayongzük.
NPCC sentong dak sentakba nung pai ‘health insurance’, ‘one classroom’, Naga yimtenren tebilemtsü aser rongsenkettsüng terenlok onüktem metetdakja Congress leniri, temerük sorkar ajanga temerük yimsüsüba agutsütsü, aser nüburtemi Tsüngrem tsübuba lenirtem shimba ajanga Tsüngrem tsübuba sorkar ka agutsütsü, ta ashi.
Iba sentong ya Tetso College Vice Principal, Hewasa Lorin lenisüba nung agi, Principal, Testo College, Dr. P.S. Lorin-i NPCC Tir aser par telok pelaa agizük aser Tsüngrem dang temoatsü meshia sarasadema liasü.