TB anogomung

Alima nung tuberculosis (TB) tashitak indang nüburtem nem rajema kümdaktsütsü aser iba tashitak meshimeshia samatsütsü nükjidong yur küm shia tanü anogo, March 24 nü omen balala nung ajemdaker ‘World Tuberculosis Day’ ayongzüka amunger aser taküm küm atema omenji World Health Organization (WHO)-i ‘TB samatsütsü asoshi longjemtsüla’ ta shimteta amunger. Alima nung nisung jenti tepsetba tashitak rongnung iba tashitak ya densema lir aser iba tashitak ajanga alima nung kümshia nisung million 1.7 shi asür. India nunga iba tashitak ajanga 2014 küm nisung lakh 2.2 asü aser 2015 küm nungbo iba dang nungi anasü agi tali, lakh 4.8 asü. 2030 küm tashi nungbo alima nung TB tashitak meshimeshia samatsütsüji Sustainable Development Goals (SDGs) nükjidong rongnung ka lir aser iba dak sentakba nung WHO-i alima linüktem aser partner tem dang TB anema longjemer raratsü atema sangoktsüogo. 2000 küm nungi tenzüka TB tashitak anema rarar, aser iba tongbang tesadang shibo kokogo, kechiyong tesüiba küm 15 tsüngda nisung million 43 iba tashitak nungi kümzükogo, ajisüaka iba takokji tongbang tesadang ka dang akokba ama züngshir, kechiyong tang alima nung anogo shia iba tashitak ajanga nisung 4,000 shi taküm samar. Alima sorkartemi longjemer research agirtem, lokti tentettem, mulungtet teloktem, nija sector aser terenlok agency tem den teka amteper inyak nungdang iba tashitak samatsütettsü. Iba tetezü, TB tashitak anema ajak longjemer raratsüla. Ano külen HIV aketertem timba tepsetba tashitakji TB tashitak ya lir; 2015 küm HIV aketer asür nisung asem nungi kabo TB tashitak ajanga asü. TB tashitak yagi tepokpok nung kongshir ajisüaka tanga tenük-telen nunga kongshitsüa akok. TB aketba temaitsü kar dang lir aser item temaitsü rongnung tali akütba, alok-metzü nung azü densema aliba, aonung asentzü tali asenba aser temang touzük kanga ajema akümba densema lir. Ano temang nung tanga tenük-telen nung kongshira item temaitsüjibo balaka asütsü. Tepokpok nung TB tashitak aketertemi akütdang, metzü metsüdang mesüra hachidang mopung nung tashitak prokba ajanga tangar nema menaloktsür. Küm shia alima nütsüng shilem katibo iba tashitak menar. Ali meimchirtem ajak kenübosa asütsü, kar arishi nung tain kümer asütsü, kar ajungben lendong balala nung asütsü aser kar tashitak balala ajanga asütsü, ajisüaka alima nung kanga timtemer asürtemji cancer aser TB tashitak agi asürtem ya asütsü südi. Tashitak kar azüabong mazüokba ajanga menar, tashitak karbo tetsü-tebou azü nungi arur, tashitak kar pei achi-ajemba mazüokba ajanga aser karbo tia makai tangar dak nungi menazüker. Alima metembang tashi tashitak balala alitsü ajisüaka pei sasa kümdangba, temang nung timtem tilaka adokdangyongi mapang shitak nung temang tendanga teyari agiba ajanga asenoki tashitak koktettsü lenmang sademsadema lir. Tanü WHO-i alimai longjemer TB tashitak anema raratsü sangoktsüdang asenokia pei sasa kümdanga aliba den timtem adokdang mapang shitak nung teyari bushiba aser tangar nema iba tashitak aser teyari balala indang osang lemsatepba ajanga iba tashitak anema raraba tongbang nung asenoki shilem agir asütsü. Kümshia March 24 nü health organizations, melungtet teloktem, sorkar aser lokti tentettemi sentong balala ayongzüka World TB Day mungyonga arur, ajisüaka asen lima nungbo aikati zübazülema iba anogo süidaktsür. Taküm asenoki iba anogo tetezü meketi  süidakjaka sangkümbo iba anogo nung Arogo aser lokti tentet balala sasep nung sentong tajung ayonga kar nem danga iba tashitak indang rajema kümdaktsüra iba anogomung teratet taliba jangjatsü.