UP nung sorkar tasenbai police 100 dak tema anentsüogo

Lucknow, March 23 (Agencies): Uttar Pradesh nung tzüzüng-ozüng benokba maparen nung zübazülema inyakba sorkari magizüktettsü, ta sayua tanü Chief Minister tasenba, Yogi Adityanath-i aniba state sorkar tasenba kübok Uttar Pradesh police-i police 100 dak tema mapa nungi anentsüogo.
Police temji Ghaziabad, Meerut aser Noida yimtitem nungi timba anentsü. Ano state yimtiba, Lucknow nunga police inspector tenet anentsüogo.
Anogo ishika tejaklen DGP, Javeed Ahmed tetuyuba nung mita aoba sülen ochimashir police tem ya jangjateta mapa nungi anentsür.
PRO UP Police, Rahul Srivastava-i, “DGP-i ochimashir police tem jangjaa parnok anema temerenshi agutsüba ajanga tanüngba police tem dang tatishitsü sayuang ta tuyuba sülen constables timba ser police 100 dak tema anentsüogo” ta ashi.
Yogi Chief Minister atema tenangzükba agiba sülen ghonda ishika tsüngda state police tongti, DGP Ahmed aser principal secretary (home), Debashish Panda nati video conferencing ajanga Police Superintendents ajak dang ochimashir police tem jangjatsü atema tetuyuba agüja liasü.
Ano tanga osang ka nung, tanü UP chief minister, Yogi Adityanath-i ajungbena Hazratganj Police Station semdanga liasü.
Home portfolio ya Yogi-i bena lir aser tanep pai ajungbena police station semdangba ajanga police aser ketdangsertem kanga aoksatep.
Osangbenertem den jembidang Yogi-i, “State nung tzüzüng ozüng koma benoker’ar reprangdangtsü atema ni iba ya semdang. State nung temzüng ozüng benoktsü, aser nüburtem ajungtsü atemabo sorkari kecha marendaki mera agitsü,” ta ashi.
Yogi-i police station nungji ketdangsertem dang police force inyakyim asüngdangba sülen pai crime branch aser cyber cell semdanga liasü.
Pai, ajungbena police station semdangba ya tang tatembang masü, saka tetenzüker dang lir, ta ashi.