Meghalaya aser Mizoram nung NH yanglutsü asoshi sen crore 6,721 agütsütsü lemtet

Aizawl, March 23 (Agencies): Centre sorkar ajanga tanü Meghalaya aser Mizoram nung National Highway kilometre 403 atema sen crore 6,721 project ka agizükogo.
“Cabinet Committee, Economic Affairs, Prime Minister Narendra Modi lenisüba kübo senden ka nung, Meghalaya aser Mizoram nung National Highway tem km 403 yanglutsü asoshi temelaba agütsüogo,” ta CCEA senden sülen Road Transport and Highways Ministry ajanga metetdaktsü.
NH km 403 yanglushitsü temelaba agütsüba nung Meghalaya nung km 52 aser Mizoram nung km 351 alitsü.
Iba project EPC (engineering, procurement and construction) yimya nung inyaktsü.
“Lenmangtem atema sen crore 6,721 indoktsü temelaba agütsüba nung, ali melen sen agütsütsüba, lenmang anasa alirtem ki belenshiba atema teyari agütsütsüba aser lenmang yanglu metenzük tsüngda sentong balala nung sen indoktsübatem densema lir,” ta parnokisa metetdaktsü.
Iba project 2017-18 financial year mapang nung mapa küma tenzüktsü aser 2025 tashi nungbo mapa tembangtsü imlar.
Meghalaya aser Mizoram nung iba sentong ajanga terenlok bener aruba ajanga temeket tesemtem nung libaliro aser senotsüren nung terenlok tali bener arutsü. Iba ajanga maneni state tsüngda aser international arrtsü nung lemangtem tali tesendaktep tajungba akümtsü, ta ministry ajanga shisem.
Two-lane lenmang yanglutsü asoshi mapatem ‘North East Road Network Connectivity Project Phase I’ sentong kübok lir. Iba sentong asoshi Japan International Cooperation Agency (JICA) nungi loan teyari agütsür.
Tang tashi nung item lenmangtem ‘single lane’ aser ‘intermediate lane’ na tsüngda nung dang lir.
Lenmang kanga jenjang tamajung nung lir, aser tesem kar nungbo gari senzütsü asoshia metemsü. Maneni lemangtem anentsü aluba aser ali atemoka aiba tesemtem lir.