Taküm TV sentongtem rongnung Khristan series adentsü

March 23, 2017 (Agencies) : Tamangba yimsü nung ajemdaker yangluba TV sentong asem 2017-18 television season premiere nung temaba jenjang nung shima sayutsü imlar.
Hollywood nung tamangba yimsü dak ajemdaker yangluba sentongtem prime-time television ajanga shimra, kobi melii asenoki Khristan sentongtem angutsü.
ABC, CBS, NBC, Fox aser The CW channel tem nung sayutsü atema TV sentong noklang aika tenüng agüja lir.
Khristantem atema tongtipang sentongtemji, “The Gospel of Kevin”, “Living Biblically” aser “For God and Country” lir.
“The Gospel of Kevin” nung actor Dennis Quaid-i shilem agitsü aser iba otsü ya Tsüngremi nisung ka dang alima kümzüktsü atema mapa inyaktsü tuyuba indang lir. Iba television sentong nung Cristela Alonzo, JoAnna Garcia Swisher aser J. August Richards nungertemia shilem agir.
“Living Biblically” ya CBS comedy ka lir aser iba nung Ian Gomez-i shilem agir. Iba otsü ya nisung kati Laishiba nung shia aliba ama pa taküm alitsü merangba indang lir. A.J. Jacobs-i züluba “The Year of Living Biblically: One Man’s Humble Quest to Follow the Bible as Literally as Possible” kaket nung ajemdaker iba series yanglu.
“For God and Country” nung Mike Vogel-i tongti shilem agir. NBC dramatic series ya Morocco nung yangluba lir aser mitkartemi bendanga agüja linük asoshi mapa inyakba indang otsü lir. Iba series nung Anne Heche-i Vogel den külemi shilem agir.