Mizoram-i Reverend William Williams bilemtetba amung

Aizawl, March 22 (Agencies) : Reverend William Williams-i mezüng Mizoram lushi nung tetsüng ajemokba bilemteta taoba Bodbarnü Presbyterian Church of India kübok Mizoram Synod-i sentong ka ayongzüka mungogo.
Iba mapang Mizoram dang Lushai country ta jaya liasü aser March 15, 1890 nü Williams-i Lushai country nung mezüng tetsüng ajemokba bilemteta sentong ka agi.
Mizoram nung Mizoram Presbyterian Church-i March 15 ya “Missionary Day” ta ser amunger. Iba telemtetba ya 2012 küm 89 buba General Assembly nung agiba liasü.
March 15, 2017 nü Mizoram Synod nung office ajak shibang aser arogotem nung Bodbar aonung sentep nung sarasadem sentong balaka ayongzüka agi.
Reverend William Williams-i March 15, 1891 nü Assam kübok Silchar nungi Tlawng ayong ajanga Aizawl (taoba mapang Aijal) atong. Pai Mizo nunger dang Osangtajung prokshi aser yimtsüng kar nungbo Lashiba tezülubatem alem.
Pai Lushai country nung missionary ka ama inyaktsü atema England dangi shidi zülu aser ibaji agizük, saka pa April 21, 1892 nü Khasi country (tang Meghalaya) nung ajungbena asü.
Iba sülen Arthington Mission-i Reverend J H Lorraine aser Reverend F W Savidge na Mizoram-i yok aser tena January 11, 1894 nü atong.
January 11 ya Presbyterian Church aser Baptist Church of Mizoram naprongi Missionary Day ta ser amunger.