Chuck Berry indang tatembangbuba kensep June 16 nü sayatsü

Los Angeles, March 23 (Agencies): Nüngtugu rock ‘n’ roll kentener asür ‘Chuck Berry’ indang tatembangbuba kensep June 16 nü sayatsü. Iba kensep ya küm 40 sülenang mangaokba kensep ka lir.
Berry March 18 nü US, Missouri nung asü. Pa küm 90 liasü.
Iba kensep nung ken tasen 10 lir, aser item rongnung 8 bo Berry-i mejema liasü. 1979 küm ‘Rock It’ kensep sayaba sülenbo ‘Chuck’ ya pa kensep tasenba asütsü, ta ‘Decca Records’ sangdong ka ajanga metetdaktsü. Iba kensep ‘Decca Records’-i acha-ayanga sayatsü.
Iba kensep nung aliba kentem St. Louis temeket nung aliba studio balala nung Berry-i produce süa mangaok. Iba kensep maneni par chir Charles Berry Jr (guitar) aser Ingrid Berry (harmonica, vocals) den külemi Berry den külemi küm 40 bass guitar atemsang Jimmy Marsala, Robert Lohr (piano), aser Keith Robinson (drums) nungeri yaria mangaok. Parnoki Berry den küm 20 shi aser sentong 200 dak tali nung shilem agia aru.
Iba kensep nung Gary Clark Jr, Tom Morello, Nathaniel Rateliff aser Chuck’er semchir Charles Berry III nungeri shilem agir.
Author aser historian Douglas Brinkley-i ken züluba nung Berry yaria liasü. ‘Chuck’ kensep nung ken karbo 1980 mapang nung Berry-i par kidang studio nung mangaokbatem lir.
2015 temang manemi akümba ajanga ken mangaoktsü aser sentong balala nung shilem agitsü mokoki aküm, saka ‘Chuck’ kensep renema sayatsü asoshi Berry sentong liasü. Pai iba kensep renemtsü asoshi par kibong aser medemer tajung Blueberry Hill kibur Joe Edwards teyari agia liasü.