Soil & Water Conservation dept-i ‘World Water Day’ among

Kohima, March 23 (TYO): Alima ajunga den külemi Soil & Water Conservation Department aser Nagaland nunga tzü mopung kümzüka ayutsü asoshi inyakertem, Group for Environment Management & Services (GEMS) ajanga World Water Day 2017 among.
‘Wastewater’ omen aser ‘Kechiba tzü indoker?’ ta asüba campaign nung ajemdaker iba anogomong ya Directorate indang conference hall nung among.
UN Sustainable Development Goal (SDG) 2030 nung tzü ali menenba tajemba kümdaktsütsü, jana indokba anentsü aser chemical tajemba indoktsü nükjidong aliba nung ajemdaker, Soil & Water Conservation Director, Imkongneken Ao-i jembi.
Tzü mopung melentepba mapang tamajung indokba: tzü tajung agitetba mapang nungi tenzüka iba tzü amshir indokba mapang tashi asenoki tzü koma amshitsüla, item onüktem nung Director-i jembi.
“Nütsüng tali renlokba ama yimti tulutem nung tzü tali nüngdaka akümer aser iba ajanga tzü tamajung timba akümer. Anungji iba tebilemtsü nungi kümzüktsü asoshi sentong tasen yanglua inyaktsüla,” ta paisa ashi.
Nüburtem tali ajangzüktsü asoshi melungtet teloktemia tzü kümzüka ayutsü nung shilem agitsü asoshi Director-isa ajungshia liasü.
Ajangshibatem aser teinyaktsü sentong kar, GEMS Tir, Impa Longkumer-ia iba anogomong nung lokti den lemsatep.
Iba anogomong nüngtem nung documentary ka Nagaland nung yangluba sayu. Nagaland nung tzü koma amshir aser tebilemtsü ajurubatem iba documentary nung sayu.
Iba sentong ya Soil & Water Conservation nung Project Director, Temjen Longkumer-i ketdangsüa ani aser Soil & Water Conservation Joint Director, Imtiyongdang Ao-i tepela anküp o jembia liasü.