State Angh, Acharya-i National Handloom expo semdang

Kohima, March 23 (TYO): Kohima, Gurkha Panchayat Public Ground, Chandmari, nung 2017 March 23 nü National Handloom Expo semdangba mapang Naga nunger rongnung sempet tajung jenti aliba ngua pelaba Nagaland aser Arunachal Pradesh Angh, PB Acharya-i lemsatepa liasü.
State nung teka mapa inyakertem aser shishilembartem ajungshitsü asoshi sorkari mapangshia yamala sentongtem achaayanga akatsüla, ta pai ashi. Yamala sentong local nisungtem ajungmesotsü atema linük yimti balala nung küm nung khenbo ayonga akatsüla, ta paisa ashi. Pai shishilembartem dang pei mapa nung temolung agüja inyaktsü asoshi ajungshia liasü. Pradhan Mantri MUDRA Yojana, koba ajanga tilateri shishilembabatem nung tali temolung agütsür, iba sentong nung maongka balala bushia agitsü asoshi pai shishilembartem ajungshi, kechiyong bank tem nung tetemlok agiba den medemdangra, iba sentong nung nüburtemi loan agiba nung tetemlok kanga agi tajemba lir.
Angh kinungtsü, Kavita Acharya-ia handlooms aser teka mapa balala nungi yanglutetba osettem sayaa aliba tajungtem ngua, iba sentong nung shilem agirtem mapa tajung asoshi tenüngsanga liasü.
Angh-i Minister of Textiles, Government of India, Smriti Irani-i iba sentong asoshi senotsü agi yariba asoshi tenüng asangba den külemi nüburtem dang iba sentong nung shilem agirtem ajungmesoa arua shilem agitsü asoshi ajungshia liasü.
Anogo 15 asoshi handloom expo ya Development Commissioner for Handlooms, Ministry of Textiles, Government of India-i senotsü agia yaria Nagaland Handloom & Handicrafts Development Cooperation Ltd-i ayonga akar.