Meghalaya-i 2022 National Games ayongtsü

Shillong, March 23 (Agencies) : Meghalaya state kümteter küm 50 jungmung den repa National Games 2022 ayonga amungtsü, ta Brihostibarnü Sports & Youth Affairs Minister Zenith M. Sangma-i assembly nung metetdaktsü.
“Meghalaya nung National Games ayonga amungtsü temelabaji December 27, 2016 nü Indian Olympic Association (IOA) lokti senden amenba mapang metetdaktsü,” ta pai telangzüba ka agütsüdang ashi.
Pai, sorkari memunui IOA den contract ka sign sütepba Meghalaya State Olympics Association-i akhümket asayamungtem ayongtsü temelaba meshitsü, ta shisem.
“National Games ayongtsü asoshi bid asütsü jenjangji sen crore 5 lir. Onoki iba mapa atema sen lakh 50 bank draft süogo aser tanüngba sen crore 4.5 ji tatembangbuba contract sign sütepba sülen ang agütsütsü,” ta Sangma-i ashi.
Aji oda süaka, opposition nung Independent züngsem, Saleng A. Sangma-i iba ama mapang tatsü tsüngda nung iba Games ayongtsü asoshi nüngdakba infrastructure renemtsü tera asaaktsü amai bilemer.
“Apu ka yanglutsü dena küm 10 nungi 15 agiba asenoki angur,” ta Saleng-i sorkar inyakyim kishia ashi.
Chief Minister Mukul Sangma-i, sorkari kanga junga asadangba sülen National Games ayongtsü asoshi telemtetba agi, ta Saleng o zükdokja ashi.
“Ya state asoshi maongka tajung lir aser iba asayamung ayongba ajanga state jenjang ajungkettsü,” ta pai Sports & Youth Affairs department aser Meghalaya State Olympic Association temi iba Games asoshi takok ngua bid asüba atema pelaba lemsatepdang ashi.
“Asenoki tang nungi iba mapa asoshi meranga inyaktsü nüngdak. Küm punguji mapang talang mesüra tatsü ta ashitsü makok. Nüngdakba kechisarena nungdena ayutsü mapang tongogo,” ta Chief Minister-i Manipur nung National Games takok ngua ayongba athisia ashi.
“Manipur nung Games ayongdang nüburtem ajaki shilem agi. Sorkar mapa inyakertemia parnok indang khenü ita sen tenla agütsü,” ta pai shisem.
National Games takok ngua ayongtettsü asoshi nüburtem ajaki shilem agitsüsa sorkari mapa inyaktsü, ta paisa ashi.