Nagaland Assembly nung bill asem benok

Kohima, March 23 (TYO): Nagaland Legislative Assembly (NLA) nung tanü bill asem benokogo.
Chief Minister, Dr Shurhozelie Liezietsu-i 2017 Nagaland Co-operative Societies Bill aser 2017 Nagaland Appropriation Acts (Repeal) Bill benok aser Health and Family Welfare Minister, P. Longon-i Nagaland Nursing Council Bill, 2017, benoka liasü.
Bill asemji March 28 nü benoka lemtepba sülen agizüka ayutsü, ta NLA Speaker Dr. Imtiwapang Aier-i metetdaktsü.
Nagaland state kümtetba nungi tenzüka 1949 Assam Cooperative Societies Act, kübok inyaka arua aliba, tawa benokba Cooperatives Societies Bill tasenba agi melentsü.
Iba bill dak sendakba nung CM Dr Shurhozelie-i ashiba agi, Nagaland state telongtet nung Cooperative Society tem pei molungka nung kümtettsüba aser ‘democratic’ yimya nung inyaktsü asoshi teyari agütsütsü atema Cooperative Society inyakyim dak sendakba nung ozüng tasen ka yanglutsüji nüngdaktsü.
Iba ozüng ajanga society balala nung züngsemtem senotsü bushibaren nung yaritsü, koba ajanga loktiliba ajunga libaliro yim tali ajungkettsü, ta paisa shisem.
Acts (Repeal) Bill nükjidong tongtibangbaji state nung tang yimsü tesüdak sorkari Parliament nung ozüng yanglua alibatem rongnung mamshiba aser mapetbatem agientsü atema lir. Item ozüng agientsü mesüra melenshitsü asoshi state Legislature dak tashi lir, ta iba bill dak sendakba nung olemtepba mapang Chief Minister-isa ashi.
HFW Minister, Longon-i nurse tem course aser training den külemi tanga tenüngdakbatem asadangtsü asoshi Nursing Council Act ka nüngdakba lemsatepa liasü.