2013 nungi tenzüker Home Department nung nisung 2447 aniok

Kohima, March 23 (TYO) : Tesüiba küm pezü tsüngda mapa balala asoshi police personnel 2447 shimogo, ta Brihostibarnü Nagaland Home Minister, Y Patton-i ashi.
MLA Mmhonlumo Kikon-i 2013 nungi State Home Department nung nisung shimokba atema tasüngdangba ka langzüdang, “UBSI, ABSI, SI (NPTO), MTSI, Havildar, THC, Constable, Clerical aser PEP mapatem nung nisung 2447 shim” ta Y Patton-i osang metetdaktsü.
2015 küm Nagaland nung Eastern district tem asoshi open advertisement ajanga police 308 aser Clerical staff 5 shima liasü, ta paisa shisem.
2013 nungi 2017 tashi mapa 2177 nung advertisement melii dang indangindanga shimok, ta Home Minister-isa metetdaktsü.
“Personnel and Administrative Department indang 2010 memorandum nung ajemdaker Police department-i sorkar dangi mapa tazüng indang osang magütsür saka Police Headquarters ajanga dang indangindanga shimoker. Külen SP aser Unit Commandant temi Grade-III aser IV staff tem shimer. Anungji iba memorandum ya meyipa reprangshitsü nüngdak,” ta Y. Patton-isa ashi.
Kiphire, Longleng aser Peren district tem tasen tentetba sülen police personnel indang mapa tasen madokba ajanga Department-i nisung aika shimoktsüsa aküm. Department nung driver tem kanga ajema lir aser ano traffic police 486 nüngdakba nungi parnok 168 dang lir, ta paisa shisem.
Ajisüaka, MLA Mmhonlumo-i Police Department nung ‘backdoor appointment’ tem lir ta temulung melemi bilemer anungji iba atema bushisüngdang asütsüla, ta metetdaktsü.
Iba onük atema MLA Tokheho-ia Department-i inyakyi metongshia inyakba indang asüngdang.
Home Minister-i osang metetdaktsüba den repsema Chief Minister Dr. Shurhozelie-i assembly dang tesüiba mapang aibelena inyakbatem tanaben meinyaktsü ta nangzük.