US nung Sikh tsür ka tsübudakja merenshi

Washington, March 25 (Agencies) : Sikh tsür, America sensotsür ka Washington subway train ka nung nisung kati laji Middle-East tsür ta bilemer la meinprong aser la dang Lebanon-i meyipa oang, iba linük na asoshi masü, ta tsübudakja merenshiba osangbener kati metetdaktsü.
Rajpreet Heir-i osangbenertem den jembiba mapang lai ajangshibatem temulung raksaa ashi.
Heir ya Indiana nung Sikh kibong ka nungi aso aser tan ita tetenzüklen Manhattan nung la lar medemer ka tasoba anogo benjongmung ka nung adentsü asoshi subway train ka nung oyaa lia temesüng nisung jagi la den ola tashii adoka jembitsü tenzük, ta Hokolbarnü osangkaket nung shia lir.
Iba nisung jagi la phone nung repranga alidang la anasa nokdaka alisang jagi la dak aroklokja, na Lebanon-i oang, iba linük na asoshi masü ta ashi.
Train nung ibaji atalokba sülen passanger anati Heir arua yari.
Tena rongnung kati la tapubang nung anepalua amer na junga lir südi ta asüngdang. Ano tetsür katibo iba tatalokba osang subway station nung alibaa police ketdangser kadang oa ashi, ta osang ka ajanga ashi.
New York yimti nung tangar mezüngmeshiba mapa nokdangtsü merangba mapang ka nung subway tesemtem ya tebilemtsü ka kümdar, ta osangkakettem nung shia lir.
Subway tem nung iba ama tatalokba aikben ataloker aser ya kanga tebilemtsü tulu küma odar, kechiba süra kodanga memetettepi aliba nisungtem aika train indang takdang tila nungji mapang talanglang külemi jajatsüsa akümer aser iba mapang lendong adoktsü melamelar asütsü, ta osang ajangasa ashi.
“Park nung kazütepdangang sung train nung amending amai kanga anasatepa makazür,” ta anti-harassment group Hollaback nung executive director Emily May-i ashi.
US nung Tir election agiba sülen subway nung iba ama tatalokba anasü agi tali akümba osang aruogo, ta kasa osang ajanga ashi.