SIM card asoshia Aadhaar card nüngdaktsü

New Delhi, March 25 (Agencies): Sorkari ‘Income Tax’ inyakyimtem atema Aadhaar number medeni meinyaktetsüba sangdongba sülen, tawa ‘SIM card’ atemaa Aadhaar compulsory kümdaktsütsü asoshi sentong yangluba osang ka ajanga metetdaktsü.
Telecom Department ajanga telecom company balala dang subscribe-tem indang SIM card parnok indang Aadhaar card den sendaktepdaktsütsü asoshi tetuyuba agütsüba kasa osang ajanga metetdaktsü.
DoT janga telecom company-tem dang iba mapa küm ka tsüngda nung renemtsü asoshi metetdaktsü.
Tang SIM card tamshidak aliba nüburtem telecom company-temi tanaben jangjashitsüla. Pre-paid aser post-paid amshirtem ajak Aadhar card E-KYC inyakyim kübok tanaben jangjashitsüla. Iba jangjashiba ya SMS ajanga asütsü. Telecom company temi verification codes customer-tem dangi yoktsü.
Nisung ka jangjatsü asoshi Voter ID aser PAN melena Aadhaar dang amshitsü akok, ta Finance Minister Arun Jaitley tawa Lok Sabha nung ashi. nisung ka jangjatsü atema tarutsünungbo Aadhaar kicha amshitsü akok, ta pai shisem.