Pak & Bangladesh den arrtsü atsüdangtsü : Rajnath

Madhya Pradesh kübok Tekanpur nung aliba BSF Academy nung Union Home Minister, Rajnath Singh-i Tanushree Pareek nem mezüngbuba tetsür combat officer naroküm agütsüdang agiba noksa angur. BSF tenteter küm 51 buba nung Rajasthan kübok Bikaner nungi Tanushree-i tetsür rongnung mezüngbuba combat officer jenjang nguogo.

New Delhi, March 25 (Agencies) : India-i kobi melii Pakistan aser Bangladesh den international boundary tem atsüdangtsü ta Honibarnü Union Home Minister, Rajnath Singh-i ashi.
Madhya Pradesh kübok Tekanpur nung aliba BSF Academy nung Border Security Force Assistant Commandants passing out parade nung o jembidang, Rajnath-i ashiba agi, “India-i kobi melii Pakistan aser Bangladesh den arrtsütem atsüdangtsü atema sentong yanglur. India-i kiralongraba anema aser refugee khuret atema inyakba mapa nung iba ya tongtipang ka asütsü.”
2018 tashi nung Pakistan den arrtsü atsüdangtsü, ta paisa shisem.
“Iba mapatong ya Central level nung Home Secretary-i, security forces nungi BSF aser state-level nung Chief Secretary temi ketdangsüa reprangtsü” ta Rajnath-isa metetdaktsü.
BSF personnel-i international arrtsütem nung inyakyim takang küma melenshiogo aser ibaji asen meketa aliba linüktemi nguogo. Iba asoshi BSF nem tenüngsang agütsür, ta paisa ashi.
Tanü Home Minister-i passing out parade nung adenba sülen BSF academy nung visitors’ book nung tenüng züluoka yutsü.
Paisa BSF Academy nung aliba National Training Centre for Dogs semdanga liasü.