Shiv Sena-i Ravindra Gaikwad dang nungi pilar

Mumbai, March 25 (Agencies) : Osmanabad nungi Shiv Sena MP, Ravindra Gaikwad-i Air India staff ka dak teksa sangshiba anema opposition teloktemi ola adokba ajanga Shiv Sena-i Ravindra Gaikwad aitsüogo.
Honibarnü Shiv Sena lennir Manisha Kayande-i ashiba agi, parnoki iba ama yimya magizüker aser Gaikwad-i Uddhav Thackeray den ajuruteptsü.
Party-i iba inyakyim süoki ia bilemer aser onoki iba yimya magizüker. Gaikwad-i inyakba mapaji onoki aitsür, ta Kayande-isa ashi.
Onoki Gaikwad menungiter aser bushisüngdang asütsü takhangba agütsüogo, ta laisa shisem.
New Delhi nung airline temi Gaikwad nokdangba sülen, pa train ka ajanga Mumbai-i aruogo.
Arishi küm 56 tain MP-i tatok meshitsü memulungba ajanga Air India den nija airline 6-i pa manitsü telemtetba agi.
Air India-i parnok tayimtsütem nung pa manitsü sentong lir ta jembiba osang atema tashi Maharashtra nung Osmanabad nungi MP Gaikwad-i “kü ket nung ticket tem lir, parnoki ni menokdangtettsü” ta ashi.
“Tanü nikongdang ni Delhi-Pune Air India flight nung amentsü. Parnoki kodaser ni manitsü. Ni tatok memeshitsü. Ni masü pai ang aibelen” ta paisa shisem.
Gaikwad-i teka sangshiba nisungji Air India Duty Manager Sukumar liasü.
“Ni Gaikwad mesüra Shiv Sena asü nunga metsübur. Ni public tenzükba wadang nung inyaka arur aser iba mesükba tatalokbatem ajurur” ta Sukumar-i ashi.
Iba onük ya Centre-i süoki ia agizükogo aser bushisüngdang ka asütsü tetuyuba agütsüogo.