Whiskers CC Dmp 8th Silver Cup T20 Cricket Tournament kokogo

Kohima, March 25 (TYO) : Nepali Baptist Church Kohima Youth Department-i ‘Cricket Ajanga Yimjung aser Telongjem’ omen nung ajemdaker Jakhama Local Ground, Kohima nung ayonga asayaba, 8buba Silver Cup T20 Cricket Tournament tanü, March 25, 2017 nü tembangogo.
Tanü final asaya nung Whiskers Cricket Club, Dimapur runs 14 agi Diphu XI telok madak takok ngua iba asayamung takok marok benogo. Parnoki iba marok 2013 küm abenba zünga tan agi tanaben buba abener.
Iba asaya toss Whiskers CC-i akok aser parnoki mezüng bat asütsü shimteter asayadang over 20 nung wicket 6 tugur runs 147 yanglua yutsü.
Par telok nungi Jiten-i runs 60 yanglubaji timba liasü aser Jalal-i runs 41 yanglu. Tanü tenati senteper runs 100 yanglubaji iba asayamung rangben Diphu XI nungi bowler Mridul-i wicket 2 agi.
Aji oda süaka Diphu-i parnok bat asüba mapang over 20 nung nisung 8 tugur runs 133 ang yaglutetba ajanga tanü iba final asaya nung tamakok angu. Par telok nungi Rahul-i runs 39 aser Ishan-i runs 32 yanglu. Whisker telok nungi bowler Jiten-i wicket 3 aser Sanu-i wicket 2 agi. Iba asaya temer Jiten nem Man of the Match sempet agütsü.
Iba asayamung nung takok agurtem nem sen 80,000 aser tanabuba jenjang nung takok angurtem nem sen 40,000 senpettem den running trophy, kulikaket aser medal agütsü.
Ano semi final asaya tongteter telok shia nem — Lower Bayavu Giants aser Radiant CC — sen 5000 senpet agütsü.
Iba asayamung nung ‘Player of the Tournament’ senpet Lower Bayavu Giants nungi Tapitu angu. Pa nem sen 5000 den trophy aser kulikaket agütsü.
Whiskers CC, Dimapur nungi Rictim-i Best Wicket Keeper aser Tejosal-i runs timba yanglutetba sempettem angu. Iba den külemi Diphu XI nungi Mridul-i wicket tmba agiba sempet angu. Parnok asemprongla nem sen meyirjang asemsem (Rs 3000 each) senpet den tropgy aser kulikakettem agütsü.
Emerging Player senpet Royal Tourniquets nungi Longsasunep-i sen 1000 den kulikaket aser trophy dena agizük.
Iba asayamung tatembang sentong nung Minister for Rural Development and REPA, CL John tongti tesemdanger süa senpettem ajak pai lemtsü.
Cricket ya ‘gentleman game’ lir aser asayar kati pei junga asayatetba asaya nung temulung ajak agi bendanga agüja asayatsüla, ta pai lanurtem ajungshi.
Pai, state nung cricket asaya ajungkettsü asoshi kanga meranga inyaka iba asayamung ayongba asoshi asayamung ayonger dang pelar, ta tenüngsang agüja ashi.
Nepal nunger loktii pei tsüraburtemi inyakba ama meranga, bendanga agüja aser tasü ita inyaktsü ayongzüker, ta pai ashi.
Iba sentong nung John Thakuri Compare asü, Priya Thapa-i ken ka aten aser NBC Kohima nung Associate Pastor Surjay B Sapkota-i sarasadema sentong tembang.