Titans-i 2nd Master Shield Cricket Trophy benogo

Titans teloki 2nd Master Shield cricket trophy agizüker külen tayonger MDT20CF den külemi tangokba noksa nung angur. Mokokchung, March 25.

Mokokchung, Mar 25 (TYO): Yaküm tamakok anguba mangyanga Titans teloki Skylark pur tsükdakja parnoki Mokokchung District T20 Cricket Federation (MDT20CF)-i ayongba 2 buba Master Shield Cricket Trophy benogo.
Tanü Imkongmeren Sports Complex Mokokchung nung 2 buba Master Shield Cricket trophy 2017 final yaküm runner-up Titans o yaküm champion Skylark na asayaba Titans-i wicket 5 agi Skylark madak takok tulu nguogo.
Takoker champion telok nem senpet asayamung marok den sen 35,000/- aser kuli kaket aser runner-up Skylark nema kuli kaket den sen 15,000/- agütsüogo.
Iba asaya nung Skylark-i toss koka tama bat asütsü shimtet aser parnoki over 20 nung wicket 7 tsüker run 105 yangluteta liasü. Aji sür, Titans pur tanabuba bat asü aser parnoki over 16 shitak nung wicket 5 tsüker lia iba run-ji menepadok.
Titans telok nungi batsman Longsasünepi run 38 aser Talikabai 25 runs arep. Iba den ano bowler rongnung Titans nungi Longsasünepi over 4 nung wicket 2 agi aser run 16 dang agütsü aser par külem medemer Toshimerenia over 4 nung wicket 2 agi aser run 22 dang agütsüba ajanga par teloki kanga junga takok ngua liasü.
Jurila nija sempet/senpet item nem agütsü; Man of the Series – Longsasünep (Titans), Man of the Match Final – Longsasünep (Titans), Best Bowler- Neehal Rai (Titans) aser Best Batsman – Daniel (Skylark). Item nija senpettem ya; Limanungsang, Imtiakum, Mejensangba, Bendang Soya, Imlitoshi parnoki yagi teyari agütsü. Champion senpet agütsür NYK aser runner-up senpet agütsür Mokokchung Senior Superintendent of Police Aotemsü den ano iba asayamung nung yariteper ajak dang pelar, ta tayongertemi metetdaktsü.
Taküm champion Titans o runner-up Skylark na Hombarnü (Mar 27) nungi tenzüka anogo asemnü Test Cricket asayamung ka Imkongmeren Sports Complex nung asayatsü, ta tanü MDT20CF tir Imnayangeri metetdaktsü.