Manipur nung Honibar ayaterm nungi longkak aiter

Imphal, March 25 (Agencies): Democratic Students Alliance of Manipur (Desam) aser Muslim nunger lokti anati Honibar aonung ayaterm nungi Deobar nikongtsütsü 6 ako tashi, independent MLA ka nem yimsüsüba menden nung shilem agütsüba atema longkak aitba sentong ka Manipur ajunga nung ayongogo.
Chief Minister N. Biren Singh-i iba dak sendakba ken o nung lemteptsü asoshi jaokba iba lokti-i magizüki longkak aitba sentong akatsü asoshi bangjemogo.
Chief Minister-i Ashab Uddin, Parliamentary Secretary ka ama shimba anema iba longkak aitba sentong ayong. Jiribam constituency nungi independent candidate-i BJP-i aniba teloktep sorkar yariba atema pa nem Parliamentary Secretary menden agütsüa liasü.
DESAM aser Joint Committee on Inner Line Permit System (JCILPS) puri Ashab Uddin-i teyari agütsüba atema anemer.
“Ashab Uddin-i inyakba mapaji nüburtem molungba anema lir. Onoki pa kuli kakettem reprangshitsü,” ta JCILPS Convener B.K. Moirangcha-i ashi.
“Lisopurtem kümzüka ayutsü asoshi longkak aitba nung senti takümtem laluogo. Lisopur masüba MLA ka teyari agitsübaji nüburtem taginüba anema lir,” ta DESAM lenirtemi ashi.
“BJP linük lenirtemi Centre nung sorkar aser NSCN(IM) na tsüngda tezüngzüktepba yanglubaji Manipur anema masü, ta Imphal nung sangdongogo. Tang NSCN(IM) puri ibaji Naga nunger longjemtsü asoshi ta ashir.
Iba ya nüburtem ashioktsüba den kasa, BJP lenirtemi iba dak sendakba ken o jangjashitsütsüla,” ta All Manipur Muslim Welfare Association tir Abdul-i ashi.
AMMCOC ajanga ashiba agi, state litsü kümzüka mali. Lisopurtem kümzüka ayutsü asoshi Inner Line Permit bill asem tekaritiba nung mapa akümtsüla.
Iba longkak aitba sentong ya BJP-i aniba sorkar asoshi tetsükdaktsüka lir, kechiyong BJP national lenir Biren Singh-i par sorkar ajanga Manipur nung longkak aitba aser lenmang nokdangba sentongtem nungi jenbua lidaktsütsü, ta nangzüka liasü.