State sorkar mapa inyakertemi lungkak aiter

Dimapur, March 25 (TYO) : State Service Association of Nagaland-i March 25, 2017 nungi tenzüka mapang telatet makai ‘pen down strike’ alitsü telemtetba agiogo.
Honibar nikongdang 4:00 ako nung CANSSEA Conference Hall nung senden ka amendang parnoki iba telemtetba agi, ta CANSSEA President aser State Service Associations Convenor, S. Takatuba Aier-i sangdong ka nung metetdaktsü.
State employee temi state sorkari dang 7th ROP mapa küma tenzüktsü atema takhangba agütsüba mataloktsüba atema lungkak aittsü telemtetba agi, ta paisa ashi.
State Service Association-i state sorkar dang 7th ROP ji January 1, 2016 nungi tenzüktsüla ta takhangba agütsü. Ajisüaka, 7th ROP ji March 1, 2017 nungi tenzüktsü ta osangkakettem nung sangdongba Association-i mulunga agizük.
State Government Association Cabinet Sub-Committee-i iba onük angatetteptsü ta nangzük saka tangatettep kati maru. Anungji, tanga lenmang kecha mali asünung State Service Association of Nagaland-i lungkak aittsüsa akümer, ta S. Takatuba Aier-isa sangdong nung shia lir.