Assam nung Greater Nagalim atema ashishiteper

Guwahati/Jorhat, March 25 (Agencies) : NSCN (IM)-i ‘greater Nagalim’ takhangba agütsüba Centre sorkari mulunga agizükogo ta Assam nung media osangtem ajanga prokshiba nung nisungtemi ashishitep tenzükogo.
NSCN (IM)-i akhangba ‘greater Nagalim’ nung Assam, Arunachal Pradesh aser Manipur kübok tesemtem dena lir.
Assam nung opposition Congress-i sangdong ka nung, “Assam litsü nung kongshia telemtetba agiba kecha magizüktsü,” ta metetdaktsüogo.
Sorkari Nagalim atema telemtetba agira, parnoki ibaji anema lokti sentong ka tenzüktsü, ta Assam nung Congress-isa ashi.
Chief Minister Sarbananda Sonowal-i iba onük atema ola madokba atema Congress-isa pa aitsüogo.
Iba onük atema Golaghat district nungbo nisung aser telok balalai tesem balala nung lungkak aitba sentongtemk agiogo.
Parnoki prime minister aser chief minister mesüka yanglur rongdok, ta osang ajanga ashi.
Hebron camp, Dimapur nung NSCN(IM) 38 buba Republic Day nung jembidang NSCN(IM) tanishir Thuingaleng Muivah-i, “NSCN(IM)-i akhangba ama Centre-i Nagaland ji state balaka ta agizükogo. Assam, Arunachal Pradesh aser Manipur nungi lushitem Nagaland nung dendakja greater Nagalim akhangba Centre-i agizükogo” ta jembiba osang local media ajanga prokshi.
August 2015 nung NSCN(IM) aser Centre tsüngda ‘peace framework’ agiba nung item onüktem dena lir, ta paisa ashi, ta local media ajangasa ashi.
Hokolbarnü Jorhat district magistrate-i Assam-Nagaland arrtsü anasa aonung curfew alitsü ozüng agütsüogo.
Ashishitep aketba lushitem nunug kiralongraba mapa inyakba nokdangtsü atema iba tetuyuba agütsür, ta District Magistrate (Jorhat) Virendra Mittal-i sangdong ka nung ashi.
“Assam-Nagaland arrtsü anasa kilometer 5 telongtet nung, aonung 8:00 ako nungi anepdang 5:00 ako tashi curfew alitsü” ta District Magistrate-isa ashi.
Mongulbarnü Dimapur nung NSCN (I-M) ‘republic day’ benjung nung NSCN-IM tanishiri Naga ‘framework agreement’ kübok Naga nunger ajak longjemtsü ta kuli agütsüba osang ka media ajanga belenshiba sülen iba ozüng agütsür.