Tesüiba MP Sukhlal Kushwaha pa sasa kahset

Bhopal, August 15 (Agencies): Madhya Pradesh nung 1996 küm chief minister Arjun Singh madak takok angusang, tesüiba mapang Member of Parliament (MP) aser BSP lenir, Sukhlal Kushwaha, Satna district nung pa sasa kahseta asü, ta Hokolbar nü osang ajanga metetdaktsü.
“Pa ya Birla Hospital nung temang treatment agiba mapang ka nung tekolak nung injang zübo keter süa liasü,” ta Satna SP, Sanjay Kumar-i osangbenertem dang ashi.
Pai, “Mezüng reprangtsü agibo pa sasa kahseta asü amai, saka osang tejangjaji bushisüngdang agiba sülen ang metettsü. Iba ya ataloker ano ghonda ishikadang süir anungji osang tejangja tangbo meshitettsü,” ta pai shisem.
Osang kar ajanga ashiba agi Kushwaha ya Satna jila nung par kidang pa sasa kahset.
“Onoki iba lendong ataloker minute ishika tsüngda anepdang 9:30 akok meta angashi aser mozü kidangi bener arur minute ishika lir süadok. Pa ya pa sasa soseta asüba yimya mesüka lir,” ta city superintendent of police (CSP), Satna, Sitaram Yadav-i ashi.
1996 küm Kushwaha-i assembly election nung toktepa liasü aser iba mapang chief minister Arjun Singh madak takok angu. Singh-i iba election nung tamakok aluba sülenbo assembly election ka nunga takok mongudang.
Iba sülen Satna nungi Kushwaha MP aküm aser küm ka tejakdang Samajwadi Party nung aden, ta osang ajanga ashi.