Modi’er sorkari Parliament raksatsür : Yechury

Mumbai, March 26 (Agencies) : Narendra Modi’er sorkari parliament raksatsür aser iba ya linük indang democratic inyakyim atema lendong lir, ta CPI (M) General Secretary Sitaram Yechury-i Deobarnü ashi.
“Uttar Pradesh elections nung Modi-i sen aputsüba magitsü ta nangzük. Pai shimba Chief Minister Yogi Adityanath-i shi alepdak shibangtsür aser par party züngsemtemi Hindu nungeri state madak yimsü asür ta jembir. Iba ya BJP indang shitakba maitsü lir, kechiyong parnoki takok anguba sülen o melenshia jembir” ta Yechury-i ashi.
“2014 küm tomlen nungi Modi’er sorkari Hindu nunger inyakyim ajungkettsü meranger. Pai aginüba India nung nübo agi tangar memenepertembo madentsü ta Modi-i osang sangoktsür. Pai aniba sorkari loktiliba nung tesentaktep raksatsüba dang masü saka democratic inyakyim raksatsür, parliament sensatsür” ta paisa metetdaktsü.
“Tawa parnoki money bill ta sayua bill 40 tashi agizükogo. Iba ajanga BJP sorkari parliament inyakyim ajembanga inyakba sayuogo” ta Yechury-isa ashi.