Asian Championship nung shilem agitsü asoshi Mary Kom renemshir

New Delhi, March 27 : Herbalife International India-i ayonga Hombarnü New Delhi nung World Winter Games nung shilem agirtem nem tenüngsang agütsüba sentong nung India tsür Badminton asayar Saina Nehwal, Olympic nng tsüngteper M C Mary Kom, Air Pistol akhar Heena Sidhu aser actress Poonam Dellon nunger dena shilem agiba noksa nung angur.

New Delhi, March 27 (Agencies): World Champion punguben aser London Olympics nung bronze angula, tsüngteper MC Mary Kom-i taküm küm Vietnam nung Asian Championship asayatsü aliba nung shilem agitsü renemshidagi.
Taoba küm World Championship nung tsüngtepba sülen, Rajya Sabha MP, Mary Kom-i tsüngtepba nungi khen asoshi anena lir.
Tsüngtepba nungi anentsü asoshi tebilemba ali mali, ta asüngdangba mapang, “Tangbo ni tsüngtepba nungi anentsü tebilemba mali. Ni tanga ‘practice’ asür. Ni ano küm ka tali tsüngteptsü bilemer,” ta arishi küm 34 tain, Mary Kom-i langzü.
Tetsürtem asoshi Asian Championship ya Vietnam nung taküm küm November 2 nungi 12 tashi tsüngteptsü sentong lir.
“November nung tsüngteptsü aliba Asian Championship ya kü nükjidong lir. India asoshi takokba sempet bener arutsütsü atema ni ano khen tsüngtepner,” ta India nungertem Special Olympics nung shilem agir nem tetushi agütsüba sentong nung adentsü aoba mapang lai shisem.
Austria nung tawa Special Olympics World Winter Games aliba mapang Indian Special Olympics ajanga Gold 37, Silver 10 aser Bronze 26 ngutet.
Taruba Olympics nung shilem agitsü asoshi terenemshiba agiba maparen nung India sorkari Mary Kom ya tsüngtepba tsütsü National Observer shimteta lir.