Nüburtemi Sorkar School pei indang amai bilemtsüla : Angh

Dimapur, March 28 (TYO) : Nagaland State nung aliba school tem atema bilemja jembiba mapang, State Angh PB Acharya-i, “Ni atema tongtibang mapa rongnung kaji school tem ya lir. Kü kinungtsü, MA Bed, Kavita Acharya-i Officers Hill Middle School, Kohima ya la meyong amai angateta iba school nung azünger kaketshirtem dang hopta nung khen oa tesayuba agütsür,” ta ashi.
Sorkar School tem tajungba kümdaktsütsü aser tashi itshidaktsütsü asoshi asen state nung zünger aliba tetsütemi mapang tenlaa Math, Science, aser English subject tem amala sayuba nung yarisemtsü marendaktsüla, ta Angh-i ashi.
Pai, küm asem tsüngda nung State nung aliba sorkar school tem nungi rank holder adokba mangur anungji ibaji melenshitsü mapang tongogo. Anungji state tesem ajak nung zünger aliba tetsütem, sorkar mapa nungi anisüngzüker alirtem mesüra kaketshitsü ngur aliba nüburtemi pei school kaka shimteter, bangdakpur dang nungi temelaba kanga junga agiba sülen kaketshirtem yari nung ajungtsü. Iba amaji inyakba ajanga asen loktisa renloktsü. Meyipa agütsüba aser lemsatepbaji tazüng tashir ka mezüng mapa lir, ta ashi.
Temulung ajemer kari iba mapa inyaktsü tenzükba ajanga state nung kaketrejutem kanga renloktsü, ta Angh-isa ashi.