King Abdullah-i Palestine state balaka tentettsü ayonger

Dead Sea, March 29 (Agencies) : Bodbarnü Jordan nung King Abdullah-i ashiba agi, state ana tangatetba nung Palestinian state tentetba ajanga dang Middle East nung yimjung bener arutsü, ta metetdaktsüogo.
Dead Sea anasa Arab summit nung jembidang King Abdullah-i ashiba agi, Israel-i Palestine nunger lushi nung kiojen yangluba ajanga yimjung dak sendakba maparen nung timtem ajurur.
“Israel-i kiojentem yangluloker aser iba ajanga yimjung alitsü nokdanger. State ana telemtetba ka ajanga Palestine state medentet tashi iba tesem nung yimjung mesüra tesünep marutsü” ta paisa ashi.
Bodbarnü agiba senden nung Arab nunger lennirtem adener saka parnoka longjema mali. Mapang talangka nungi Arab nung lennirtem Palestinian state ka tentettsü atema inyaka arur saka taoba ita U.S. President Donald Trump-i iba ya mataloktsü ta jembiba sülen parnoki maneni iba telemtetba pusemtsü atema senden ayonga amen.
Taoba ita Israeli Prime Minister Benjamin Netanyahu den külemi White House news conference ka nung Trump-i iba mangatettep atema state ka kümtettsüba tangatetba pusemer ta shia liasü.
Palestine aser Arab nungertemi Arab East Jerusalem aginür. Iba ya 1967 rara nung Isreal-i atsünga agiba tesem lir.
Palestine aser Arab nungertemi Israel-i atsünga aliba West Bank aser Gaza Strip densema Palestine linük kümtetnür aser yimtibaji Arab East Jerusalem südaktsünür.