‘Reckless Kids’ noksa tajungba shimtet

March 29, 2017 (Agencies): 2017 Sony World Photography Awards nung tetendangertemi tanü Nikunj Rathod-i tangokba noksa “Reckless Kids” India National Award takok angur lir ta sangdongogo.
Sony World Photography Awards ya alima nung photography tetoktepba nung tulutiba lir. Iba tetoktepba nung alima ajunga nungi photographer temi shilem agitettsü. Iba sentong nükjidongji, linük 65 nungi local photographer temi tangokba noksa rongnungi tajungtiba ka shimtettsü asoshi lir.
Rathod-i tangokba noksa “Reckless Kids” koba ajanga takok angu, iba noksa ya Mumbai Mahim bay nung tanurtem asayatepa alidang tangokba noksa ka lir.
Arishi küm 29 tain Rathod ya independent film yanglur ka lir. Pa ya film yanglutsü aser noksa tangoktsü jangraba nisung ka lir aser pai yaküm India National Award tanabuba jenjang ngua liasü.
” Iba noksa yaküm March ita Mumbai, Mahim bay nung tangoka liasü. Ni iba tesem nung silhouette photograph kar agitsü asoshi nemzüa ataa liasü. Iba mapang nung talang nungi ni tanur telok ka gari tamajung bendenba tesem ka nung asatepa bottle agi kati ka dang mereplokja züktepa angu. Iba tesem anasa tonga orr reprangdang parnok kanga dang ‘reckless’ ta ni reprangtet,” ta Rathod-i ashi.
Iba tetoktepba nung India National Award atema tanabuba jenjang Avishek Das nem pa noksa “The Faith of Life ” aser Prabha Jayesh nem “Untitled” noksa atema agütsü.
Rathod noksa tanga jenjang nung takok angurtem den külemi Sony World Photography Awards & Martin Parr – 2017 Exhibition London nung April 21 aser May 7 nung sayatsü aser annual winners’ book nunga adoktsütsü.