Angh-i Hepong asüba mangyimer

Dimapur, March 29 (TYO): Tanü Nagaland Angh, P B Acharya-i sangdong ka ajanga, “1961 küm Tuensang Assembly Constituency nungi Interim Body Member aser lenir tain, Hepong Phom asüba osang angashia ni mangyimer,” ta ashi.
Asür Hepong Phom ya Nagaland Interim Body Members taküm alir rongnung ka liasü aser Nagaland State tentetba nung shilem agir ka liasü, iba den külemi Naga nunger ajungtsü atema bendanga agüja inyaker ka liasü, ta sangdong nung shia lir.
“Tensa mapang tamajung nunga state terenlok atema asür Hepong Phom-i shilem tajung agiba aser bendanga tenzükbaji ajaki bilemtettsü. Pa asüba ya Naga nunger, talisa Phom nunger atema takoksa tulu lir,” ta paisa ashi.
“Mangyimertem nem tashi aser tesünep agüjang ta ni sarasademtsür. Asür tanela tesünep nung anisüngzükangma,” ta kasa sangdong nung metetdaktsü.