India ajunga nung Motorcycle aser Scooter jenjang tajemba agi ayoker

New Delhi, March 30 (Agencies): Motorcycle yangluba Hero MotoCorp, HMSI, Bajaj Auto aser Suzuki Motorcycle company tem ajanga sen 22,000 tashi agi tajemba nung BS-III model indang motorcycle tem ayoker.
Supreme Court ajanga taküm April 1 nungi tenzüka BS-III model indang motorcycle tem ayoktsü aser registration agitsü nokdangba ajanga item motorcycle tem ya jenjang tajemba nung ayoktsüsa aküm.
India nung tetsüng ana aketba talongtsü lakh 6.71 lir aser item talongtsütem rongnungi lakh 8 dak tali BS-III model lir. Item talongtsü ya April 1 matongdang aika ayoktsü nükjidong nung jenjang tajemba nung agütsütsüsa aküm.
Honda Motorcycle & Scooter India (HMSI) ajanga BS-III model indang motorcycle aser scooter nung sen 10,000 agi tajemba nung ayok tenzük, saka March 30 nikongdang nungibo sen 22,000 agi tajemba nung ayok. Activa 3G (sen 50,290), Dream Yuga (sen 51,741), CB Shine (sen 55,799 nungi 61,283) aser CD 110DX (sen 47,202 nungi 47,494) talongtsütem nung sen 22,000 meyiba agütsür, ta company ajanga ashi.
Hero MotoCorp ajanga yangluba talongtsü nung BS-III engine alirtem nung sen 12,500 tashi tajemba agi agütsür. Iba talongtsü ayokertem ajanga ashiba agi, scooter nung sen 12,500, premium bike nung sen 7,500 aser tanga talongtsütem nem sen 5,000 agi tajemba nung agütsür. Hero MotoCorp ajanga yangluba talungtsü jenjang tajemba nung agütsürtemji, scooter Duet (jenjang sen 49,480), Maestro Edge (sen 51,030), motorcycle Glamour (sen 59,755) aser Splendor 125 (sen 55,575) alitsü.
Suzuki Motorcycle India ajanga ‘Let’s scooter’ aser Gixxer motorcycle tem nung jenjang tajemba agi ayoker. Sen 47,272 nungi 53,766 tashi indang scooter nung sen 4,000 agi tajemba aser helmet ka angati agütsür aser sen 77,452 nungi 90,421 tashi agi anguba Gixxer motorcycle nung sen 5,000 nungi 7,000 agi tajemba nung agütsür.
Bajaj Auto ajanga yangluba motorcycle nung BS-III engine alibatem nunga sen tajemba agi agütsür. Bajaj Platina nung sen 3,000 aser Pulsar RS200 nung sen 12,000 agi tajemba aser insurance angati agütsür.
“Tang yanglua aliba motorcycle tem ya meyokmara tanga linük nung bener oa ayoktsü. Onok indang motorcycle ya linük 70-shi nung ayoker,” ta Bajaj Auto (Business Development & Insurance) nung tir, S Ravikumar-i osangbener dang ashi.
India nung gari yangluba company tulu, Ashok Leyland aser Mahindra & Mahindra indang garitem nunga jenjang tajemba nung ayoktsü asoshi sentong yangluba mapang lir.
BS-III engine aliba talongtsütem ajanga nisung temang nung timtem agütsüba ajanga 2017 küm April 1 nungi tenzüka BS-IV engine yanglutsü asoshi Supreme Court-i tetuyuba agüja lir.