MP nung tesayurtem attendance atema Control Room lapoktsü

Bhopal, March 30 (Agencies): Madhya Pradesh nung Education department-i sorkar school 18,000 nung tesayurtem ‘attendance’ reprangtsü atema control room ka lapoktsü, ta osang ka ajanga metetdaktsü.
Yashi Madhya Pradesh nung School Education Minister, Vijay Shah-i, “Tesayurtem school-i aru-maru mita reprangtsü atema state nung control room ka lapoktsü. Iba control room phone number ji sorkar school 18,000 shia nung sayatsü,” ta metetdaktsü.
Bhopal nung sentong ka nung jembidang Education Minister-i iba osang sangdonga liasü. Kasa sentong nung state Chief Minister, Shivraj Singh Chouhan-a liasü.
“School notice board nung aliba control room indang phone number nungji nisung mashie kati tesayurtem ‘attendance’ indang metetdaktsütsü akok,” ta minister-isa shisem.
Ano külen Chief Minister, Chouhan-i, class 12 tatidang nung mark shilem 75 dak tema angur kaketshir ajak ‘Mukhya Mantri Medhavi Chaatra Protsahan Yojana’ tajangzük atema temsüa akumtsü, ta ashi.
Iba scheme ajanga tajangzük angutsü atema kaketshir tsürabur mesüra guardian ka küm ka nung income ji sen lakh 6 dak tema masütsüla, ta CM-isa shisem.