Highways nung yi nokdangba tetuyuba agientsü SC-i memelunger

New Delhi, March 30 (Agencies): Linük nung aliba National Highways ajak nung yi ayokba nokdangtsü atema Supreme Court-i tetuyuba agüja liasü, aser tanü Supreme Court-isa iba tetuyuba magientsü telemtetba agiogo.
Supreme Court-i December 2016 mapang tetuyuba ka nung linük nung aliba state Highways aser National Highways nung metre 500 telongtet nung yi ayokba dokantem shibangtsü tuyua liasü, aser iba tetuyuba agientsü atema kari benokba temepishibatem SC-i angadanga liasü, saka SC-i temepishibaji magizük.
Kerala, Himachal Pradesh, Arunachal Pradesh, Punjab, Telangana aser Haryana densema state aikati Supreme Court dang, metre 500 telongtetjibo kanga tulu, anungji ibaji tera ajemtsüla ta mepishi.
2016 küm December 15 nü state tem dang tetuyuba nung Supreme Court-i, March 31, 2017 nü sülenbo tang National aser state highways nung aliba yi dokantem license ji renew mesütsütsüla, ta tuyua liasü.
March 23, 2017 nü Tamil Nadu sorkari Supreme Court dang, highways nung yi dokantem shibangtsütsü atema November 28, 2017 tashi mapang atsülangjang, ta mepishia liasü.