Lok Sabha nung GST Supplementary Bill 4 agizükogo

New Delhi, March 30 (Agencies): Tanü Lok Sabha nung Goods & Services Tax (GST) supplementary bill pezü agizükogo, aser ibaji ajanga July 1 nungi GST mapa küma inyaktsüsa lenmang lapokogo.
Opposition party temi ashishiba ajanga temelenshi kar benokba sülen Central GST Bill, 2017; The Integrated GST Bill, 2017; The GST (Compensation to States) Bill, 2017; aser The Union Territory GST Bill, 2017 agizük.
GST atema ghonda tenet o toktepba mapang Union Finance Minister, Arun Jaitley-i, GST ajanga linük nung uniform indirect tax ka dang alitsü, aser ibaji ajanga osettsüset/chiyungtsütem tera dalangba akumtsü, ta ashi.
Union Minister-isa, GST rates ji- osettsüsetji takartemi asü tilartemi amshir’ar ibaji asadanger latettsü, ta ashi.
Jaitley-i, kodang GST mapa küma inyakdir ketdangsertemi shishilembartem dang tim mesüi inyakba anentsü aser linük tesem ajaklen osettsüset ka atema rates ka dang asutsü, ta ashi.
Pai ashiba agi, Union aser state tem nungi Finance Minister temi akumba GST council-i küm ka tsüngda real estate-a ozüng tasenba küboki aitdaktsütsü telemtetba agiogo.
Jaitley-i, “Tanübo nenoki saru madak saru agutsür. Kodang item ajakji agiendir osettsüset tera dalangba akumtsü,” ta ashi.
GST küboki central excise, service tax, VAT aser tanga sarutem aittsü, aser ibaji ajanga uniform market ka akumtsü, iba den külemi GST ajanga GDP growth shilem 2 agi timba akumtsü aser saru magütsüba tebilemtsü koktettsü.
Revenue Secretary, Hasmukh Adhia-ia twitter ajanga, “GST Council züngsemtem aser ketdangsertemi meranga inyakba süngjang tangja Lok Sabha nung bill 4 agizükogo, ” ta metetdaktsü.
Adhia-isa, bill pezü agizükba ya linük rongsenkettsüng putiotsü nung alizüng ka tongtetba lir, ta ashi.
Opposition party temi, kechiba sorkari bill temji ‘Money Bills’ ama benok? ta asüngdangba langzüdang Jaitley-i linük temzüngtem nung ajemdaker, 1950 küm nungi tenzüka saru dak sentakba ozüngtem ajak Parliament nung Money Bill ama benoker, ta metetdaktsü.