Texas:Arogo bus lendong nung nisung 12 asü, 3 yiru

Uvalde, March 30 (Agencies) : Bodhbarnü Texas anüolentip tsütsü anüolen tesem nung aliba ‘two-lane’ highway ka nung Arogo bus gari aser pickup truck ka na tsüktepba lendong nung nisung 12 asü aser nisung 3 yiru. Iba bus gari nungji Arogo nungi retreat-i aoer telok ka mena liasü, ta ketdangsertemi ashi.
Iba gari lendong nung asürtemji Arogo nungi nisung taintem liasü aser parnok ya New Braunfels, Texas nung aliba First Baptist Church züngsemtem lir.
Bus gari nungji Arogo nunger nisung tain parnok nisung 14 aser pickup truck gari nungjiba gari anisang dang liasü. Iba gari ana ya Garner State Park tezülen Uvalde County anüdokelntip tsütsü US 83 nung anüngdang 12:30 ako meta atalok, ta Texas Department of Public Safety Sgt. Conrad Hein aser Arogo sangdongtem ajanga metetdaktsü. Lendong atalokba tesem ya San Antonio anüolen nungi mile 75 (120.7 km) pilar lir.
Hein-i, bus gari nung mena aliba nisung ana den pickup truck gari anisang nungerji mozükidang anir oa yaridar. Tenla kidang nungi mile 120 (193.1 km) pilar atalokba lendong ya kechi komaser atalokar ano tejangja memetet, ta ashi.
National Transportation Safety Board (NTSB)-i iba lendong atalokba tesemi bushisüngdangertem yokogo, ta NTSB otongdar Terry Williams-i ashi.
Bus nung mena aliba Arogo nungertemji Leakey nung aliba Alto Frio Baptist Encampment nung anogo asemnü retreat munger arurba iba lendong atalok. Parnok amungba tesem nungi mile 9 (14.5 km) shiang pilar lia parnok gari tsüktep, ta Arogo nunger sangdong nungji shia lir.
Texas Angh Abbott aser kinungtsü nati asüku lemsatep aser Arogo nungeri Texas nung aliba nüburtem dang lendong nung yaritepba atema pelar ta ashiba den ano maneni sarasadem nung yariang, ta sangdong ajanga temepishiba lemsatep.