Venice Apu poksastsütsü tasa asar asem apu

Venice, March 30 (Agencies) : Kosovo nungi jihadist ta temulung melemi bilemba nisung asemi Brihostibarnü Venice, Italy nung aliba Rialto Bridge poktoktsütsü sentong yangluba puteta kiralongrar nokdangba police teloki pua lir.
“Venice nung bomb pokloktsüba ajanga indang indanga kotaki aotsü. Yangi mamanger jenti lir aser onoki Rialto Bridge nung bomb pokloktsütsü nüngdak,” ta parnok asem rongnung kati ashiba sorkar okatsür Adelchi D’Ippolito-i osangbenertem dang ashi.
“Pai iba o ashiba ya yaküm lendong atalokba bushisüngdangertemia angashiogo,” ta D’Ippolito-i ashi.
Police-i, iba dak sendakba nung Mestre aser kidanger province Treviso tesemtem nung aliba apartment 12 tashi mita aiba mapang Kosovo nungisa tanur ka pua lir, ta ashi.
Tang pua aliba temulung melemteti aliba nisung pezü prong ket nungji Italy nung alitsü temeten indang permit tem liasü, ta police-isa ashi.
Parnoki ashiba agi, Brihostibarnü mita aoba mapaji Venice nung aliba sorkar okatsürtem tetuyuba nung aoba lir.
Item nisungtem ya mapudang kiralongrar nokdangba teloktem jagi mezüngbuba tamangba balala anemer telok, jihadist züngsemtem kanga junga mita liasü.
2015 January ita Charlie Hebdo-i Paris amakba sülen nungi Italy kanga kümdanga aliba mapang ka nung ano taoba hopta London lendong atalokba sülen security tali akhangshiogo.
Taküm küm tetenzüklen nungi kiralongrar asütsü akok ta temulung melemi bilemba parnok nisung 21 tashi linük nungi aridokogo aser 2015 January ita nungi tang tashi nung nisung 153 tashi aridokogo, ta Interior Ministry ajanga metetdaktsü.