Mizoram-i bendanger 31 nem tasoba kulikaket agütsü

Aizwal, March 30 (Agencies) : 2012 nungi 2015 tashi nung Mizoram-i bendanger nisung 31 tashi nem tasoba kulikaket (Birth Certificate) agütsüba osang state Planning & Programme Implementation minister Lalsawta-i Brihostibarnü state assembly senden amending metetdaktsü.
Mizo National Front (MNF) telok nungi Lalruatkima-i asüngdangba langzüba mapang Lalsawta-i, tasoba kulikaket timtiba agütsübaji 2013 küm liasü. Iba küm ajak agi tasoba kulikaket 17 tashi angütsü, ta ashi.
Pai, bendangertem nem tasoba kulikaket agütssübaji linük arrtsülen timba agütsür, kechiba süra Bangladesh aser Myanmar state tem nungi state nung aliba mozükitem nung tanur asotsü asoshi arur, ta ashi.
Mizoram Legislative Assembly senden ya state asoshi küm piyong budget latettsü asoshi March 14, 2017 nü nungi tenzüka amen aser tanü Brihostibarnü tembangogo.