Cricket ya Olympic saisapong kümdaktsütsü mapang tetemsü: ICC

London, March 30 (Agencies): “Cricket ya 2024 Olympic nung asaya ka kümdaktsütsü asoshi maparen tenzüka inyaktsü tang ya mapang tetemsü,” ta International Cricket Council (ICC) Chief Executive, David Richardson-i Brehostibarnü ashi.
“ICC nung züngsem timbai iba asaya ya Olympic nung asayadaktsütsü tang mapang shitak lir, ta bilema alitsü ni imlar. Iba asaya Olympic nung asayadaktsüba ajanga alima ajunga dangi prokshitsü” ta arishi küm 57 tain, South Africa nunger Richardson-i London nung osangbener dang ashi.
“2024 Olympic nung asaya tasen inoktsü asoshi IOC-i September tashi nung renemtsü imlar. Anungji iba maparen asoshi July ita tashi nung onoki telemtetba ka agitsüla,” ta paisa shisem.
2024 nung Olympic ayongzüktsü asoshi linük ana liasüba nungi Paris dang kümogo aser iba tesem nung 1900 küm Olympic nung cricket ya tatemsa asaya aser iba mapang Great Britain-i run 158 agi France madak takok angu.
Richardson-i ICC nung Chief Executive mapa ya 2012 küm June ita nungi abener aser iba asaya ya Los Angeles aser Paris nung asayadaktsütsü asoshi takoktsü lir, ta bilemer.
“Cricket ya Olympic nung asayadaktsütsü asoshi IOC ajanga agizükra tamasa qualifier asayadaktsütsü. Olympic nung asayatsü asoshi Twenty20 ya tajungba asütsü aser iba asaya atema telok aikabo marutsü südi. Anungji iba asaya ya rugby dang tajungba asütsü,” ta paisa shisem.