Madeira Airport nüngja Ronaldo tenüng nung melen

Lisbon, March 30 (Agencies): Atlantic Ocean nung asetkong, Madeira nung Portugal captain Cristiano Ronaldo aso, iba tesem nung aliba airport pa tenüng nung Bodhbarnü melenogo.
“Iba airport kü tenüngi melenba ya kanga jangratemtsüka lir,” ta Ronaldo-i ashi. Pai anir yaküm European championships nung Portugal-i takok ngua liasü.
Iba airport nüngja melenba sentong nung par kinunger den külemi Portugal Tir Marcelo Rebelo de Sousa, Ato Kilonser Antonio Costa aser pa sapurtem nisung 5,000 shi aden.
“Iba airport kü tenüng nung melentsü asoshi ni masüngdang saka parnoki iba tetushi agütsüba atema ni kanga pelar,” ta pai shisem.
Pa asoba jila Funchal nung Ronaldo nem akhüm tetushi agüja museum ka aser pa mesüka yongmiyin agi kürak yanglu ka yanglua lir.