NNPGs-i longjemba atema tenüngsang agutsür: CNTC

Dimapur, March 30 (TYO): Naga yimtenren telok pongui NNPGs Working Group tentetba atema Nagaland GB Federation (NGBF) aser Eastern Nagaland People’s Organisation (ENPO)-i March 9 aser March 14, 2017 na nung tenüngsang agüja India sorkari NNPGs Working Group den jurila ken o akatsü nungitba sangdonga liasü, aser maneni tanü Central Nagaland Tribes Council (CNTC)-ia yimtenren telok pongui telongjem mera agia Working Group tentetba atema tenüngang agutsü.
“Asen Naga nunger adianutem longjemba ya mapang talangka nungi Naga nungeri aginüa aliba ka lir, aser iba ya ajanga atangji, tarutsü atema lenmang tajung lapoktsü,” ta Media Cell, CNTC-i sangdong ka ajanga metetdaktsü.
“CNTC-i tang yimtenren tensa ya kanga junga shisadanga arudar, iba onük nung junga o lemtepogo aser NGBFs o ENPO tangatetba den onok tangatetba mesüktepa lir,” ta CNTC-i ashi.
“Maitsü balaka wazüka ayuba aser Naga nunger putiotsü tashi itdaktsüba den külemi telemtetba kechi agidir agiaka iba nungji telok ajak dendaktsütsüla, aser telatetba kecha makai telongjem tama südaktsütsüla. Telongjem makai aser nüburtem shisa magii telemtetba agira ibaji ajanga lokti nung makmakshimak dang jaoktsü, aser tang Naga nunger telemsa aliba nung ano tali telemsa adokdaktsütsü,” ta CNTC-isa metetdaktsü.