Yimjak nung ochimashi onük nung o tokteptsü jazüker: ACAUT

Dimapur, March 30 (TYO): NPF Media Cell nung züngsemtemji-a inyakyim tim mesüi shimba süra, mesüra Chief Minister atema press secretaries ama state sorkar nungi itasen agia lira, parnoka tim masüba lenmang ajanga shimbatem lir ta ashitsü akok, ta tanü Media Cell, ACAUT Nagaland-i sangdong ka ajanga ashi.
“NPF-i jazükbaji ACAUT Nagaland-i agizüker aser tekaraba nung ozü züngsemtem indang rongsen/kiojen sangdongtsü. Iba den külemi ACAUT-i MLA 60 prongla aser NPF media cell züngsemtem dang iba atema renema alitsü ayongzüker. Tanemer ka jazükba sülen iba nungjagi atsüngshira ibajibo akhümket malitsü ta media cell dang nenshia metetdaktsür,” ta ACAUT Nagaland-i metetdaktsü.
“Naga nunger atema teintet telok ka ama ACAUT-i NPF dang masü saka tanga yimtenren party ajak danga ochimashi onük dak ajemdaker yimjak nung o tokteptsü jazüker. Yimjak nung o toktepba ajanga vote agutsütsüpurtem tangazükba anguba dang masü saka yimsüsürtem maitsü-a melenshitsütsü,” ta sangdong nung shia lir.
“Iba den külemi, ACAUT züngsemtemji yimtenren agents mesüra NPCC, RAW, IB, CIA, KGB, Mossad et al ama den sendakteptsüaka, atangji nung state sorkar jungkai adoktsüogo. Tim masüba lenmang ajanga mapa nung shimokba, jang ochimashi, totzü meyoktepba, MNREGA blank cheque, tesayurtem itasen nung ochimashi, Finance Department 10% deduction ochimashi, 2-lane lenmang ochimashi, sen Cr. 100 pension ochimashi aser CSS ochimashi ajanga state sorkar jungkai adoktsüogo,” ta ACAUT-i ashi.
“State Angh-ia state nung ochimashi jenjang ajanga aoksaba yimjak nung metetdaktsüba den jang nung ochimashi mapa aitsüogo ta NPF Media Cell dang nenshia metetdaktsür. ACAUT-i President’s Rule atema takhangba khen dang agutsüba atema NPF media cell-i pelatsüla,” ta parnokisa ashi.
“NPF Media Cell-i, NPF sorkari sensaker atema inyaker ta jembibaji temenünütsüka lir aser tamachi. Tang tashi nung Naga nunger sensakertem atema sen crore 500 shi jenjang PDS SK oil aser sen crore 1200 jenjang PDS jang Chief Minister-temi agiogo. Sen crore meyirjang aika jenjang wheat agi Naga nunger sensakertem ket kodang matonger mesüra Nagaland nung itemji tanaben seper tanga state tem nung yokdoker. Yamaji PDS shini nunga ataloker,” ta ACAUT-isa ashi.
Tang teinyakdak Chief Minister-i Assembly nung, state nung PDS tajangzük angur 14, 02,579 lir ta shiogo. Nagaland nütsüngji lakh 12 dak tali masü ta NPF media cell-i memetet no? Aadhar card issue asütsü limit, lakh 11 jungdar. Iba den külemi ajakji PDS tajangzük angurtem masü, shiba tajangzük angur, takar asü sensaker, state nung tajangzük angur lakh 14 nem PDS jang /SK oil agutsür saka lakh ishika nem dang agütsür? Media Cell-i ongko inyaktsüla,” ta ACAUT Media Cell-isa ashi.
Tim masüba lenmang ajanga mapa nung shimba dak sentakba nung ACAUT Nagaland-i, “Sorkari Naga nunger lanur tetemsü shirnok nem mapa agutsü ? NPF media cell züngsemtemi, tim masüba lenmang ajanga shimokba BDOs, CDPOs, Senior Lecturers, Medical officers, Veterinary Officers, JEs temji reprangdangra parnokji timba MLA tem, party lenirtem aser ketdangsertem jala-jabasotem lir ta metettsü. NPF sorkari sensakertem sendokba tatishitsü tajungtibaji- tim masüba lenmang ajanga mapa nung shimokba ya lir,” ta ACAUT Nagaland-isa metetdaktsü.