IFFM nung ‘Piku’ ajanga Best film award angu

August 16, 2015: Indian Film Festival of Melbourne (IFFM) 2015 Award “equality” omen nung anogo ananü tashi kar yasüng tembangogo.
Melbourne nung aliba National Gallery of Victoria nung iba Award sentong nung Australian High Commissioner to India Patrick Suckling, Indian High Commissioner Navdeep Suri, Australian billionaire Anthony Pratt, Consul General Manika Jain, Anil kapoor, Bhumi Padnekar, Simi Grewal, Sonam Kapoor, film director Shojit Sircar, Rajeev Masand, aser Victorian special minister Gavin Jennings nunger densema tongtibang nisung aika denogo.
Taküm kümbo iba award sentong 69 buba Indian Independence Day anogomung amshia liasü, anungji yashinep Melbourne, Federation square building nung sentong ka ayongzüka Anil Kapoor aser Suri nati India wako songa liasü.
2015 atema IFFM best film award ji “Piku” film ajanga agizük, best director award ji Shoojit Sircar-i angu, “Dum Laga Ke Haisha” film nungi Bhumi Pednekar-i la asoshi tang mezüng award, best actress award angu aser best actor award Piku film nungi Irrfan Khan nem agütsü.
“Kaka Muthai” film ajanga best indie film award angu aser Best Telstra People’s Choice Award ji PK film asoshi Rajkumar Hirani nem agütsü. Ano Anil Kapoor nema world cinema nung junga inyaktetba atema special award for excellence agütsü.
Award sentong nung jembidang Visy & Pratt Industries Executive Chairman, Pratt-i, pa ya Australia nung India nunger sapur ka lir, ta ashi.
“Ato kilonser Narendra Modi yimsüsüba kübok taruba küm 10 ji India nung puti otsü tajungtiba ka asütsü ta ni amanger, aser Bollywood film ajunga ajanga tenükjang billion 2.6 sayutetbaji nenok tashi ajanga lir,” ta Pratt-i ashi.
“Ni tenla mapa inyakba, Pratt Foundation-i food security nungi tenzüker kanga sensakertem aliba tesem tajungba küma melenshitsütsü densema India nunger tebilemtsü onük aika asoshi inyaktsür,” ta paisa ashi.
Sangkümbo pai India nung business tenzüktsü, aser ibaji shilem 100 India nung recycled packaging company asütsü, ta paisa shisem.
Iba award sentong nungsa India aser Australia naprongla nungi designer tem indang collections nungi fashion show kaogo. Designer temji Anamika Khanna, Gaurav Gupta, Roopa Pemmaraju, Susan Dimasi aser Richard Nylon nunger liasü.
Fashion show tatembanglen designer Anamika collection nungi Sonam Kapoor-i hon agi tua yangluba süoshi temesüng semer ramp nung sayaa liasü.