Gujarat nung nashi tepsetra akumli piyong tepoukdak puoktsü

Ahmedabad, March 31 (Agencies): Hokolbarnü Gujarat nung Bharatiya Janata Party (BJP) sorkari nashi tepsetba atema ozüng tesashiba yanglua, nashi tepsetba nung shilem agirtem taküm tepiyong tepoukdak ayutsü ozüng züngogo.
State Assembly nung Gujarat Animal Preservation Act 1954 ozüng yanglushiba agizükogo, aser iba ozüng kübok, nashi tepsetba nung aibelenertem akumli piyong tepoukdak ayutsü aser senchi lakh 5 tashi achitsü.
Ozüng tasenba nungsa, nashishi bena alirtem küm 7 nungi küm 10 tashi tepoukdak ayutsü.
Iba amendment agizükba ajanga, state nung nashi tepsetba nung aibelenbaji tangbo bail magutsütetba aibelen ka kümogo.
Ato kilonser, Narendra Modi Gujarat chief minister inyakba mapang Gujarat sorkari Gujarat Animal Preservation Act of 1954 ozüng yanglushia nashi tepsetba, nashishi shibelenba aser nashishi ayokba khenyongi nokdanga liasü.
Iba sülen 2011 küm nungi tenzüka Gujarat nung nashi tepsetbaji Gujarat Animal Preservation (Amendment) Act 2011 küboki aiter.