Voters nem sen agutsür nem temerenshi agutsütsü: EC

Chennai, March 31 (Agencies): Tanü Election Commission (EC)-i, yimtenren party mesüra candidates shirnoki April 12, 2017 nü R K Nagar Assembly by election atema vote agutsütsüpurtem nem sen mesüra sempettsüpet agutsüdir, idangyongjisa temerenshi agutsütsü, ta metetdaktsü.
Deputy Election Commissioner, Umesh Sinha-i election tiptema agitsü atema asadanga inyakdar, aser pai, vote agutsütsüpurtem mesüzüktsü atema parnok nem sen aser sempettsüpet agütsüba osangtem lir, ta ashi.
“Yimtenren party mesüra candidate temi mesüzükba maparen ajak Election Commission-i nokdangtsü,” ta shia Sinha-i ibaji mita reprangtsü atema stakeholders ajaki nungitdaktsüner, ta mepishia metetdaktsü.
Tongtibangtiba shilemji vote agütsütsüpurtemi agir, ta shia Sinha-i, “Memesüzükdaktsüi vote agutsübaji kanga tongtibang ta parnoki angatettsüla,” ta ashi.
Sinha-i ashiba agi, Income Tax department, Enforcement Department ketdangsertem aser surveillance teams-i airports, railway stations aser bus stands ama tongtibang tesemtem nung sen jenti belenba mita reprangtsü.
“Yi jenti alemba mita reprangtsü atema onoki Commercial Tax department dang metetdaktsüogo. Onoki shishilembartem danga item mapa nungi pilaa alitsü tekümdangtsü shiogo. Yi dokan ajak tenük yoka reprangtsü,” ta pai ashi.
Sinha-isa, EC-i shimba observers-i R K Nagar Assembly by election atema party tem aser candidate tem tenük yoka reprangdar, ta metetdaktsü.
“Tamil Nadu nung elections mapang rara madokba inyakyim tajung lir, anungji ibaji maneni benshitsüla,” ta pai ashi.
Iba election nung candidates aikati tokteper, ta shia pai, EC-i taila candidates dak tenük yoktsü, aser parnoki tanga candidates mesüra party kar atema nübo yimtsüra parnok nem temerenshi tulu agutsütsü, ta ashi.
Yaküm December ita nung taoba Tamil Nadu Chief Minister aser AIADMK tongti, J Jayalalithaa asüba ajanga iba election agitsüsa akum, aser iba menden atema candidates ajak agi parnok 62 tokteper.