China-i Kim Jong-nam tasümang atongba metetdaktsü

Beijing, March 31 (Agencies) : Hokolbarnü North Korea lenir tedi Kim Jong-nam indang tasümang Malaysia dang nungi temelaba agir Kuala Lumpur nungi Beijing ajanga Pyongyang-i tayimtsü nung benerogo.
“Malaysia nung tepsetsang, North Korea senso, Kim indang tasümang Beijing ajanga par linüki benerogo,” ta China Foreign Ministry atema otongdar Lu Kang osangbenertem den senden ka amenba mapang metetdaktsü. Saka pai iba mapang Kim Jong-nam tenüng metetshi.
Lu-i, “Malaysia-i Kim Jong-nam tepsetba nung dena lir ta temulung melemi aliba North Korea nunger anata Malaysia yimtiba nungi tayimtsü nung Pyongyang-i ogo,” ta tena tenüngbo meshii metetdaktsü, ta osangbenertemi ashi.
Malaysia Ato Kilonser Najib Razak-i, Kim Jong-nam tasümang sensaa reprangba sülen asür kinungertemi mepeshiba ama pa mangji North Korea-i meyiptsütsü, ta sangdong ka nung shia lir.
February ita nungi North Korea nung sota aliba Malaysia nunger nisung 9 prong par linüki yokogo, ta Pyongyang-ia osang tejangja ka metetdaktsüogo.