ASCI-i ‘Fastest Mobile Network’ ‘Advertisement’ indoktsü metetdaktsü

Mumbai, March 31 (Agencies): Broadband tendanger Ookla-i Airtel ya India nung mobile network tekaratiba ta sangdong. Saka Advertising Standards Council of India (ASCI)-i Bharti Airtel indang ‘advertisement’ tem TV Commercial (TVC) aser website nung agütsüba ya 2017, April 11 tashi nung yanglushitsü mesüra indoktsü metetdaktsüogo.
Saka ASCI ajanga lemtetba ya Bharti Airtel ajanga magizükteter aser temzüng nung aliba ama temepishiba agütsütsü, ta company-i ashi. ASCI nem iba tashishiba ya Reliance Jio ajanga agütsü.
“TVC aser website nung advertisement agütsüba ya ASCI Code Chapter I.1, I.4, I.5 aser IV.1(b) aser ASCI Guidelines indang Disclaimers Clause I alema lir. Anungji TVC aser website nung Airtel ajanga advertisement balala agütsüba ya 2017, April 11 tashi nung melenshitsü mesüra agientsü asoshi shiogo,” ta ASCI-i sangdong ka nung metetdaktsü.
ASCI-i temzüng balala yangluba dak alaka item temzüngtem ya mapa küma inyaktsü makok. Saka parnoki ministry balala nem osang agütsür.
ASCI telemtetba ya Fast Track Complaints Committee (FTCC) senden ka 2017, March 29 nung amenba mapang agi.
“TVC ajanga advertisement nung sayuba ama 4G technology den puteba maliba ta FTCC ajanga ngutetogo. 4G data tekara mesüra mekara asadangba ya mobile notification bar nung angur aser signal tashi kanga ajema sayur. Anungji advertisement nung agütsüba ya tiazü ta FTCC-i ajiteter,” ta ASCI-i ashi.
“ASCI-i lemtetba ya onoki magizükteter aser temzüng nung aliba ama onoki meneni mepishitsü. Onoki item advertisement ya Ookla-i bushitetba nung ajemdaker agütsür aser Ookla ya mobile speed tendangba nung alima ajunga nung kanga nüngtugu lir,” ta Bharti Airtel-i sangdong ka nung ashi.
“Airtel ya India nung ‘Fastest Mobile Network’ nüngja agütsütsü asoshi tetendangba balala agiba nung Ookla-i nokdaka lir. Iba nüngja agütsütsü asoshi ‘IP methodology’ amshia taoba ita trok tashi tendanga aruogo,” ta Ookla-i ashi.
“2016 küm tendangba nung Airtel ya tekaraba liasü aser 2017 küm tenzüker tang tashi tendangba nunga Airtel ya tekaraba lir,” ta Ookla-isa ashi.