India Open Super Series 2017 : PV Sindhu-i Saina koka semi-final tongogo

New Delhi, March 31 (Agencies) : New Delhi nung tang tasayadak, 2017 India Open Super Series nung Hokolbarnü PV Sindhu-i Saina Nehwal akokba ajanga la semi-final asayatsü maongka ngutetogo.
Iba asaya ya kanga dang toktepa asayaba asaya ka liasü.
India nungi tetsür badminton asayar tajungtila ana international asaya nung tan agi tanaben ajurutepa asaya. Aji oda süaka Sindhu kanga junga asayaba agi lai Saina madak 21-16, 22-20 agi takok angu. Iba takok ajanga la semi final menden tongtet.
Siri Fort Complex nung sentepa aliba badminton reprangertemi Olympics nung medal angula ana tsüngda asayaba ola adoka pelatepa reprang. Asaya metembang tashi tena rongnung shibai akoktsüar ashitsü mokoki liasü.
Nisung kari Saina! Saina! ta ashibaji ano telok kari “Sindhu! Sindhu!” ta shia parnok ola nembangja iba asaya reprangtep.
Telok yamaji asatepaka asayar anati pei asaya nung temulung bendanga agütsür asaya aser mezüng game nung mapa kabo tena 7-7 aküm. Ajisüaka Saina-i terara zükpetba ajanga Rio Olympic nung silver medallist Sindhu-i 21-16 ngua mezüng game akok.
Tanabuba game tenzükdang Saina-i mezüng service ao aser la 4-1 agi timba aküm.
London Games nung Bronze medal angula, aser tesüiba mapang World No 1 Saina-i kanga junga asayameso aser la 11-7 akümba sülen ano 14-10 aküm.
Ajisüaka Sindhu-i point asem atonga anguba sülen nungi game kanga melenshi.
Tena tsüngda points 19-19 aser 20-20 küma kanga toktepa asayayonga atuba sülen tatem nung Sindhu-i iba game 22-20 agi akok.