Cherrapunji nung tzünglu asemnü maneni arur

Shillong, March 31 (Agencies): India tesem ajunga nung tzünglu marui akongba mapang ka nung North East India nungbo tzünglu aru tenzükogo.
Assam, Meghalaya aser Manipur nung ghonda 24 shi tzünglu maneni arur. Assam nung aliba Silchar aser Meghalaya nung aliba Cherrapunji tesemtem nung tzünglu aruba asadangba nung züngdangba asem tashi jungogo.
Brehostibar anepdang 8:00 ako nungi ghonda 24 tsüngda Silchar nung tzünglu 242 mm aru. Iba tesem nung ita ka nung tzünglu aruba ya 152.6 mm dang, saka ghonda 24 tsüngda nung iba tzünglu aruba alemogo. Tang tashi nung Silchar nung tzünglu 364 mm arua lir. Iba ajanga ita shia tzünglu aruba küm 7 tsüngda nung tang timba kümogo.
Cherrapunji nung anogo ana tzünglu aruba ya 164.8 mm lir.
Cherrapunji nung ita shia tzünglu 228 mm arur, saka tang tashi nung 595.7 mm aruogo.
North East tesem balala nung yamaji tzünglu aruba osang lir.
Bangladesh aser West Bengal tsütsülen cyclone mopung ajanga North East nung tzünglu arur. Iba den külemi Bihar nungi Bangladesh aser Assam ajanga Nagaland tashi mopung aonba ajanga iba tzünglu ya bener arur, ta osang ajanga ashi.
Ajidang masü saka Bay of Bengal nungi south west tsütsüleni tzüsem aliba mopung aonba ajanga North East tesemtem nung tzünglu ya tali arur, ta kasa osang ajangasa ashi.