Syria:March ita nung nisung 2,800 süogo

Damascus, April 1 (Agencies) : March ita Syria nung tajemba agi nisung 2,826 süogo, ta Honibarnü Britain nung amenoka aliba rara asadanger teloki metetdaktsü.
Syrian Observatory for Human Rights (SOHR)-i, taoba ita tasüba atalokbaji February ita nisung 2,854 asüba den meneptepa liasü, ta ashiba osangbenertemi metetdaktsü.
Iba telok jagi ashiba agi, tasürtem rongnungji tajemba agi civilian 858 dena lir aser ano item rongnungjia tanurtem 141 aser tetsürtem 131 densema lir.
Syria aser Russia nati bomb pokloktsüba mapang civilian 288 asü aser Syria regime force temi amakdang nisung 76 asü. Iba den külemi tepuokdak nisung tenet tashi rishikangshia tepset.
Sorkar anemertem aser Islamic telungpurtemi amakba mapang civilian 31 asü aser Islamic State (IS) telungpurtemi amakdang nisung tenet asü.
IS telungpurtemi civilian 15 tashi tekong tangzüka südaktsü aser Islamist teloktemi nisung pungu tashi tepset.
Iba den külemi Turkey nungeri bomb pokloktsüdang aser Turkey nunger arrtsü anüker sepaitem injang agi civilians 14 asü. Ano US-i aniba teloki bomb pokloktsüdang nisung 281 tespet aser Kurdish militias-i aniba Syrian Democratic Forces (SDF)-ia nisung pezü tepset. Gari nung tapoktsü pokdaktsüba mapang nisung 57 asü.
Tasür rongnungji Shia, Iraq nunger 43 dena lir aser parnok ya IS telungpurtemi Damascus nung bomb pokloktsüba mapang asübatem lir.
SOHR-i, March ita lendong balala nung IS aser Al Qaeda telungpurtem dena tanga kiralongrar ajak senteper parnok nisung 762 tashi süogo, ta metetdaktsü.
Syria nung küm trokbuba maneni rarar aser iba mapang nisung 260,000 dak tema süogo, ta SOHR-i sangdong ka ajanga metetdaktsü.